Törek matbuğatına küzätü 25.10.2022

”Sabah” gazetı “Türkiyä ğasırı” isemle yazmasında citkergänçä, Türkiyä ilbaşı Racäp Tayyip Ärdoğan kabinet cıyılışınnan soñ yasağan belderüendä “Bez cömhüriyätebezne säyäsi, iq’tisadi, sośial’ häm dipomatik ölkälärdä millät bularaq xıyallanğan däräcägä kiteräçäk alğarışnı “Türkiyä ğasırı” dip atadıq. Bu vizion yaña buınnarğa bezneñ mirasıbız bulaçaq” dide.

”Yeni Şafak” gazetı “Türkiyädä häm AQŞta ğına bar” dip yaza. Küptän tügel dön’ya kürgän videoda Akıncı pilotsız höcüm itüçe oçu apparatında “miniatyur bomba” kürende. Türkiyä häm AQŞtan başqa bütän ildä yuq dip sanalğan bu qoralnı pilotsız oçu apparatınnan atu Änkaranı här yaqtan nığıtaçaq täräqqiyät’ dip bäyälänä.

”Hürriyet” basması “Greśiya döresen äytte: Türkiyä citeştergän yaña qorallar bezne qurqıttı” isemle yazmasında citkergänçä, Greśiya mediasında urın alğan ber analizda “Türkiyä üzen global’ köçkä äyländerü planın totrıqlı räweştä tormışqa aşıra. Greśiya waqıyğalarnı yaqınnan küzätep bara, läkin dramatik räweştä artta qala” diyelä.

“Star” gazetı ”Armiyäbez öçen Türkiyä saqlanu sänäğätenä ışanabız” digän yazmasında Vengriya saqlanu ministrınıñ süzlären uquçıları belän urtaqlaşa. Vengriya saqlanu ministrı Kristof Szalay-Bobrovniçkiy üz ileneñ 2017 nçe yıldan birle tarixındağı iñ zur xärbi üseş êşlären alıp baruın belderep bolay dide: “Bu qısalarda bez üz armiyäbezne zamança, NATO belän garmoniyäle cihazlar belän täêmin itäbez. Bez Türkiyä saqlanu sänäğätenä ışanabız. Türkiyä saqlanu sänäğäte belän başqa mäs’älälärdä dä xezmättäşlekne üsterergä telbez” dide.

”Haber Türk” gazetı “Trabzonğa kruiz turları belän 4 meñ turist kilde” dip xäbär itä. Trabzonda 5 yıldan soñ cäyge çorda yañadan kruiz turları başlandı häm 3 ay êçendä şähärgä 4 meñgä yaqın turist kilde.