Törek matbuğatına küzätü 07.10.2022

“Xäbär türk” gazetı yazğança Türkiye ilbaşı Räcäp Tayyip Ärdoğan Awrupa säyäsät cämğıyäte cıyılışında qatnaşır öçen kitkän Çexiya başqalası pragada cıyılış aldınnan Azärbaycan däwlät başlığı Aliyev häm Ärmänstan prem’yer-ministrı Paşinyan belän 3 yaqlı söyläşü ütkärde. Ärdoğan Vengriya prem’yer-ministrı Viktor Orban häm Franŝiya prezidentı Êmmanuêl’ Makron belän dä küreşte. Türkiyä liderı Törki däwlätlär oyışması belän bäyle söyläşkändä Makronğa: “Sine dä kertik. Barısı da Awrupa ğına tügel,” – dide.

“Sabah” basması beldergänçä Türkiye ilbaşı Räcäp Tayyip Ärdoğan Pragada açıqlaw yasap Ärmänstan belän normal’läşü maqsatına ışanuın citkerde. Greŝiya prem’yer-ministrı Kiryakos Miçotakisnıñ provokativ çığışları turında ilbaşı bolay dip belderde: “Xäzerge waqıtta Greŝiya belän söyläşer ääber yuq.”

“Xörriyät” gazetı xäbärenä kürä Türkiyäneñ Ênergetika häm tabiğıy çığanaqlar ministrı Fatix Dönmez İstanbulda oyıştırılğan Türkiyä-Azärbaycan 2nçe Ênergetika forumında qatnaştı. “Ozaqlamıy ênergetika tarmağıbızdağı xezmättäşlekne tağın da üsteräçäk xökümätlärara kileşü tözergä planlıybız,” – digän ministr tübändägeçä däwam itte: “Trans Anadolu tabiğıy gaz ütkärgeçe TANAPnıñ 16 milliard m3 bulğan sıydırışlılığın 32 milliard m3 itep yasıybız.”

“Star” basması citkergänçä Tön'yaq Kipr Törek Cömhüriyäte tışqı êşlär ministrı Tahsin Êrtuğruloğlu Tön'yaq Kipr Törek Cömhüriyäteneñ Kiprdağı törek xalqınıñ möstäqıyl’ däwläte buluın assızıqlap, bu cirlärdä wazifa başqaraçaq çit il köçläreneñ Tön'yaq Kipr Törek Cömhüriyäte xaqimiyätennän röxsät aluı zarurlığın äytte. Ministr bolay dip däwam itte: “Berläşkän Millätlär Oyışmasınıñ Tınıçlıq köçe Grek tarafı rizalığı belän genä wazifa başqara almıy.”

“Yeni Şafak” gazetı yazğança tanılğan Amerikalı aktyer Robert Davi İstanbul aêroportın yarattı. Davi oçqıçtan töşkännän soñ soŝial’ säxifädä turıdan-turı êfirğa çığıp, aêroportnı maqtadı. Tanılğan aktyer: “Çınnan da bik matur hawa mäydanı, AQŞtağı hawa mäydannarınıñ depressiv buluın uylıym,” – dide ul.