Törek matbuğatına küzätü 31.05.2022

“Haber Türk” gazetı Ärdoğannıñ “Finlyandiyä belän Şveśiyäneñ NATOğa kerüe risklı” digän süzlären alğı planğa çığara

Törkiyä ilbaşı Räcäp Tayyip Ärdoğan “The Economist” jurnalına yazğan mäqaläsendä terrorçılarnı yaqlağan Finlyandiyä häm Şveśiyäneñ NATOğa kerüläreneñ risklı buluın belderde. “Şveśiyä häm Finlyandiyäneñ berlektäş bulırğa telägän däwlätlärneñ qurqınıçsızlıq problemaları häm borçularına qarata mönäsäbätläre Törkiyäneñ bu illärne niçaqlı berlektäş bularaq kürergä teläwen bilgeläyäçäk,”-dide ilbaşı.

“Hürriyet” gazetı Ärdoğannıñ Putin häm Zelenskiy belän söyläşüen citkerä.

Törkiyä ilbaşı Ärdoğan Rusiyä däwlät başlığı Vladimir Putin häm Ukraina liderı Volodimir Zelenskiy belän telefon aşa söyläşte. Anda suğış temasınnan başlap global’ azıq-tölek krizisı häm başqa regional’ mäs’älälär qaraldı.

“Vatan” gazetı Törkiyä belän AQŞ arasındağı kritik söyläşü xaqında yaza.

Törkiyä ilbaşı süzçese İbrahim Kalın AQŞ milli iminlek kiñäşçese Djeyk Sallivan belän telefon aşa söyläşte. Anda separatist terrorçı oyışma PKK/PYD/YPGnıñ Törkiyäneñ qurqınıçsızlığı häm Süriyäneñ cir bötenlegenä yanawı iğ’tibar üzägenä alındı.

“Sabah” gazetı Süriyä oppoziśiyäseneñ Törkiyägä teläktäşlek yullaması cibärüen xäbär itä.

Törkiyä ilbaşı Ärdoğannıñ Süriyädä terrorçılarğa qarata yaña xärbi operaśiyä signalı birüennän soñ töbäktäge Bäşşar Äsäd rejimı oppoziśiyäsennän teläktäşlek xäbärläre kilde. Süriyä milli armiyäse: “Törek armiyäseneñ yanında köräşäçäk meñnärçä suğışçıbız bar” dip belderde.

“Star” gazetı “Ênergetikada 'Made in Türkiye' cile” dip yaza.

Ênergetika häm tabiğıy çığanaqlar ministrı Fatix Dönmäz Törkiyäneñ cil ênergiyäse texnologiyäläre tarmağında ähämiyätle markağa äwerelü yulında zur tizlek belän alğa baruın belderde. Ul “Made in Türkiye” dip yazılğan turbinalarnıñ dön’yanıñ här poçmağında cil ênergiyäse citeşterüdä qullanıluın äytte.