Törek matbuğatına küzätü 22.03.2022

“Hürriyet” gazetı İbrahim Qalın süzläre belän “Bu suğışta ciñüçe bulmayaçaq” dip yaza.

İlbaşı idaräse süzçese İbrahim Qalın Rusiyä belän Ukraina arasındağı suğış turında bolay dide: “Bu suğışta ciñüçe bulmayaçaq. Dön’yanıñ tağın ber salqın suğışnı kütärerlek xäle yuq”. Ul Törkiyäneñ bu suğışnıñ betüe öçen tırışuın assızıqladı. “Bez Rusiyä yağı belän dä, Ukraina belän dä yaqınnan söyläşep êşçänlegebezne däwam itäbez,”-dide Qalın.

“Star” gazetı İtaliyäneñ teläktäşlege xaqında citkerä.

İtaliyä tışqı êşlär ministrı Luidji Di Mayo Törkiyäneñ Rusiyä-Ukraina suğışı säbäple alıp barğan diplomatiyäse turında belderü yasadı häm aradaşçılıq êşçänlegen tulısınça yaqlawın äytte.  

“Haber Türk” gazetı Törkiyägä 63 yaña tikşerenüçe kilüen citkerä

Sänäğat’ häm texnologiyä ministrı Mostafa Varank Törkiyä fänni häm texnologik tikşerenü oyışması TÜBİTAKnıñ programması qısalarında ilgä 63 yaña belgeçneñ kiläçägen belderde. Alarnıñ 47se törek.  “Şulay itep, ilebezneñ fän, yañarış häm innovaśiyä êkosistemasın tağın da köçäytäbez,”-dide ministr.

“Vatan” gazetı Törkiyä saqlanu sänäğateneñ Doxadağı êşçänlege xaqında yaza.

Kiçä Katarda "Doxa xalıqara diñgez saqlanu kürgäzmäse häm konferenśiyäse” başlandı. Anda 3 kön buyı 20 ildän 200dän artıq firma üz êşlänmälären kürsätä. Törkiyä saqlanu sänäğatennän 32 şirkät qatnaşa.

“Yeni Şafak” gazetı “Kon’ya 2023nçe yılnıñ sport başqalası bularaq saylandı” dip xäbär itä.

Kon’yanı Awrupa sport başqalaları häm şähärläre federaśiyäse 2023nçe yılnıñ Bötendön’ya sport başqalası dip iğ’lan itte. Bu dön’yadağı iñ abruylı sport titullarınnan berse. Kon’ya, şulay itep, Törkiyäneñ berençe, Awrupanıñ isä Madridtan soñ ikençe sport başqalası buldı.