Төрeк мaтбугaтынa күзәтү - Törek matbuğatına küzätü 04.03.2022

“Watan” gazetı: “Ärdoğan: “Törkiyä köçle bulırğa tiyış”

İlbaşı Räcäp Tayyip Ärdoğan Törkiyäneñ säyäsäte belän, iq’tisadı belän, ğaskäre belän, sośial’ qorılışı belän köçle bulırğa tiyeş buluın belderde. Ärdoğan: “Töbägebezdä hiçber waqıyğanıñ, hiçber krizisnıñ Törkiyädän bäysez bula almawı – inqyar itelä alınmaslıq çınbarlıq”, - dip äytte. Ärdoğan, Rusiyä-Ukraina suğışın misal itep kürsätep: "Bolardan ğıybrät alıp yulıbızğa däwam itäçäkbez”, - dip basım yasadı.

“Xörriyät” gazetı: “Çavuşoğlu: “Humanitar koridor qararınnan bez qanäğät”

Tışqı êşlär ministrı Mäwlüt Çavuşoğlu Ukraina tışqı êşlär ministrı Dmıtro Kuleba belän telefon söyläşüen ütkärde. Söyläşü waqıtında Ukrainadağı könüzäk täräqqıyätlär quzğatıldı. Çavuşoğlu Rusiyä häm Ukraina wäkillekläreneñ tınıç xalıqnıñ êvakuaśiyası öçen regional’ däräcädä dä bulsa humanitar koridor buldıru mäs’äläsendä kileşügä ireşülärennän qanäğät buluların citkerde. Çavuşoğlu bu koridornıñ, ber yaqtan, keşelärne êvakuaśiyäläw mömkinlegen buldırsa, ikençe yaqtan, bu töbäklärgä humanitar yärdäm citkerüen ciñeläytäçägen belderde.

“Xäbär Türk” gazetı: “Qalın: “Suğış waqıtında da xätta ülçäwne quldan ıçqındırmıyq”

İlbaşı idaräse süzçese İbrahim Qalın “Twitter”dağı akkauntınnan yasağan belderüendä urıs keşesen häm mädäniyäten çitläştermiçä Rusiyäneñ xatalı säyäsäten tänqıytläwneñ, berkemneñ dä qotırtuına birelmiçä Ukrainanıñ suverenlıq xoquqların häm bäysezlegen yaqlawnıñ mömkin buluına basım yasadı. Qalın: “Suğış waqıtında da xätta ülçäwne quldan ıçqındırmıyq”, - dip äytte.

“Sabah” gazetı: “İke taraf belän dä söyläşä alğan berdänber il Törkiyä”

Ğomum ştab küzläw departamentınıñ layıqlı yaldağı başlığı armiya generalı İsmail Hakkı Päkin, Törkiyäneñ Rusiyä häm Ukraina belän söyläşä alğan berdänber il buluınıñ möhimlegenä basım yasap: “Törkiyäneñ ike taraf arasında strategik ähämiyäte bik zur. Kiyerenkelekneñ azaytıluında zur cawaplılığıbız bulaçaq”, - dide. Päkin Törkiyäneñ hawa kiñlegennän tış böten hawa kiñlekläreneñ Rusiyägä yabıq buluınıñ da söyläşülär öçen Törkiyäne alğı planğa çığara alaçağın äytte.

“Star” gazetı: “Liviyadan Törkiyägä räxmät”

Liviyanıñ Misrata qalasında öyränülären tämamlağan xärbi uquçılar öçen çığarılış tantanası oyıştırıldı. 53nçe pexota brigadası lagerındağı tantanada uquların tögällägän xärbilär belän bergä tanklar häm aralarında Törkiyädä êşläp çığarılğan “Kerpe” dä bulğan xärbi texnika parad belän uzdı. Liviya Ğomum ştab başlığı, armiya generalı Möxämmäd Ali Haddad ğaskärilärne äzerläwdä üzlärenä bulışlıq itkän Törkiyägä räxmätläten belderde.