Törek matbuğatına küzätü 22.02.2022

“Hürriyet” gazetı “İlbaşı Ärdoğan Senegal belän yaña säwdä maqsatın açıqladı” dip yaza.

Törkiyä ilbaşı Räcäp Tayyip Ärdoğan Dakarda Senegal-Törkiyä xezmättäşlek forumında yasağan çığışında yaña maqsatlar turında belderde. “400 million dollar säwdä äyläneşe maqsatına barıp cittek. Xäzer maqsatıbız – 1 million dollar. Bergä köç quyıp bu kürsätkeçkä dä tiz arada ireşäçägebezgä ışanam,”-dide ul.

“Sabah” gazetı Şäntopnıñ Gruziyä turındağı belderülären alğı planğa çığara.

Törkiyä Böyek Millät Mäclese räise Mostafa Şäntop Gruziyägä räsmi säfäre waqıtında: “Gruziyäneñ suverenlığına häm cir bötenlegenä birgän köçle teläktäşlegebez däwam itä. Bu mäs’älädäge poziśiyäbezne här platformada assızıqlıybız,”-dide.

“Habertürk” gazetı” Törkiyä keşesez hawa aparatlarında çit illärgä bäylelektän qotıldı” dip citkerä.

Baykar texnologiyä liderı Sälçuk Bayraktar dronnar mäs’äläsendä ilneñ çittän import yasawdan qotıluın belderde. Ul Törkiyäneñ keşesez hawa apparatları tarmağında dön’yada berençe öçlekkä kerüen dä citkerde.

“Star” gazetı Törkiyägä kilüçelär sanın xäbär itä.

Mädäniyät häm turizm ministrlığınnan alınğan mäğ’lümatlarğa qarağanda, uzğan ayda iñ küp turist Rusiyädän kilgän – 134 meñ 215 keşe. İkençe urında – Bolgariyä. Annan 109 meñ 971 keşe kilgän. İran isä 106 meñ 957 turist belän Törkiyägä säfär yasawçılar sanı buyınça öçençe.

“Yeni şafak “ gazetı Törek hawa yullarınıñ rekord oçış planlaştıruın citkerä.

Törek hawa yulları kiläse cäydä Antaliya, Dalaman, Bodrum-Milas häm İzmirdän 29 däwlättäge 47 şähärgä atnada 388 turı reys yasayaçaq. Şulay itep, Törkiyäne regionnıñ turizm märkäze xälenä kiteräçäk.