Törek matbuğatına küzätü 15.02.2022

“Sabah” gazetı Törkiyä belän Berläşkän Ğaräp Ämirlekläre arasında 13 kileşü imzalandı dip yaza. Törkiyä ilbaşı Räcäp Tayyip Ärdoğannıň älege ilgä säfäre qısalarında kiçä Törkiyä belän Berläşkän Ğaräp Ämirlekläre arasında saqlanu sänäğäte, sälamätlek saqlaw, klimat üzgäreşe, sänäğät’, texnologiya, mädäniyät, awıl xucalığı, säwdä, iq’tisad, ciröste häm diňgez transportı, afätlär belän idarä itü, metereologiya, yäş’lär, êlemtä häm arxiv ölkälärendä 13 kileşü imzalandı.

 “Star” gazetı yazğança, Ukrainanıň Änkaradağı tulı wäqalätle ilçese Vasil’ Bodnar Rusiya häm Ukraina arasındağı kiyerenkelek belän bäyle xälne Törkiyäneň aradaşçılığı yärdämendä  tınıç yullar belän çişep bulaçağın belderde.

“Vatan” gazetı Törek hawa yulları avaikompaniyäseneň Ukrainağa reyslar xaqındağı belderüen alğı planğa çığara.

Törek hawa yulları (THY) Ukrainadağı waqıyğalar arqasında bu ilgä bilet satıp alğan yulçılarğa biletlarnı kire tapşıru häm üzgärtü xoquqı birelüen citkerde. Räsmi zatlar şulay uq oçışlarnıň däwam itüen dä belderde.

“Yeni Şafak” gazetı citkergänçä, Urman xucalığı injenerları palatası räise Xäsän Türkyılmaz Törkiyäneň iň küp ağaç utırtqan illär isemlegendä Awrupada berençe, dön’yada dürtençe urında toruın äytte. Türkyılmaz:” 30 yıl êlek Törkiyäneň öslek mäydanınıň 19,78 million gektar cire urman belän qaplanğan bulsa, bügenge köndä 22,9 million gektar cir urman belän qaplanğan”,- dide.

“Haber Türk” basması Törkiyäneň ançous balığı êksportı kürsätkeçlären uquçıları belän urtaqlaşa.

Törkiyä 5 ayda 26 ilgä 1 meň 247 tonna ançous sattı.Uzğan yılnıň 1 nçe sentyabrennän bıyılnıň 31 nçe ğıynwarına qadär başqarılğan ançous êksportı il iq’tisadına 5 million 676 meň 301 dollar tabış kiterde.