Төрeк мaтбугaтынa күзәтү - Törek matbuğatına küzätü 07.02.2022

“Star” gazetı: "Dön’yadan İlbaşı Ärdoğanğa häm xäläl cefetenä şifa teläkläre"

Dön’ya liderları “Kovid-19” yoqtırğan İlbaşı Räcäp Tayyip Ärdoğan belän xäläl cefete Äminä Ärdoğanğa şifa teläklären citkerde. İlbaşı Ärdoğan üzenä şifa teläklären citkerüçelärneñ barısına da räxmätlären belderde.

“Xäbär Türk” gazetı: "“TANAP”nıñ citeşterü artuın yaqlıybız"

Törkiyä ênergetika häm tabiğıy çığanaqlar ministrı Fatih Dönmäz, “TANAP” Trans Anadolu tabiğıy gaz ütkärgeçe proyektınıñ citeşterü külämeneñ arttırıluınıñ kön tärtibendä buluın belderep: "Xörmätle (Azärbaycan İlbaşı) Aliyev ta, Azärbaycan ênergetika ministrı Şahbazov ta êzläw häm êşläp çığarudağı investiśiyälärne tizlätülären, bu ütkärgeçkä bireläçäk gaznı bik qısqa waqıt êçendä sistemağa qudıra alaçaqların citkerde. Bez dä citeşterü artuın yaqlawıbıznı belderdek”, - dip äytte.

“Yäni Şafak” gazetı: "Avtomobil’ industriyası ğıynwar’da 2.2 milliard dollarlıq êksport başqardı" 

Törkiyäneñ avtomobil’ industriyasınıñ ğıynwar’ ayındağı êksportı 2 milliard 200 million dollar bularaq tormışqa aştı. İl êksportında berençe urında bulğan tarmaqnıñ tuplam êksport öleşe isä 12.7% buldı.

“Xörriyät” gazetı: “İstanbul aêroportı Awrupada berençe"

“EUROCONTROL” Awrupa hawa navigaśiyası qurqınıçsızlığı oyışmasınıñ 27nçe ğıynwar’ -3nçe fevral’ könnärendäge oçış mäğ’lümatlärenä kürä, İstanbul hawa mäydanı tuplam 7 meñ 55 reys belän Awrupada iñ küp oçış yasalğan aêroport buldı.

“Sabah” gazetı: "Ruslarnıñ Törkiyädä 5 yoldızlı êş säğäte"

Rusiyädä “Kovid-19” awıru oçraqlarındağı artu arqasında ilneñ aldınğı şäxsi banklarınnan “Sovkombank” personalın distanśion êşläw öçen Törkiyädäge 5 yoldızlı qunaqxanälärgä cibärergä buldı. Oçqıç biletların häm toru çığımnarın şirkät üz östenä alğan programma qısalarında "back office" xezmätkärläre häm sanaq belgeçläre ber atnalığına Törkiyägä cibäreläçäk. Fäqät Törkiyägä kiläçäk xezmätkärlärneñ vakśinaśiyälängän buluı şart.