Törek matbuğatına küzätü 31.01.2022

“Haber Türk” gazetı Ärdoğannıñ süzläre belän “Törkiyäneñ sälamätlek saqlaw asqorması alğa kitkän illärdän uzdırdı” dip yaza

İlbaşı Räcäp Tayyip Ärdoğan Törkiyäneñ sälamätlek saqlaw asqormasınıñ şähär xastaxanäläre, xezmätkärläre, aşığıç yärdäm maşinaları, vakśinaları, daruları belän aldınğı illärne uzıp kitüen belderde.

“Star” gazetı Törkiyäneñ Rusiyä häm Ukraina öçen ışanıçlı xezmättäş buluı turındağı fikerlärne citkerä

Azärbaycan analitigı Turan Rzayev ilbaşı Ärdoğannıñ Rusiyä belän Ukraina arasındağı aradaşçılıq täq’dimenä bäyä birep ike däwlät öçen iñ ışanıçlı xezmättäşneñ Törkiyä buluın äytte. “Änkaranıñ Kiyev belän dä, Mäskäw belän dä yaqın êlemtäläre bar. Bu nisbättän Törkiyäneñ aradaşçılığı  yaqlarnıñ kileşüe öçen bik ähämiyätle,”-dide ul.

“Sabah” gazetı “Törkiyä Liviyädä balanslarnı üzgärtte” dip yaza.

Katarnıñ “Al Jazeera” gazetındağı analizda Törkiyäneñ Liviyädäge säyäsi häm xärbi yoğıntısınıñ Tön’yaq Afrika häm Urta diñgezdäge balanslarnı üzgärtüe äytelä. Anda yazılğança, Törkiyä Liviyäneñ iminlek tözeleşeneñ ber öleşe, töbäktä çit köçlärgä qarşı balanslawçı rol’ uynıy.

“Yeni Şafak” gazetı yaña törek vakśinası turında xäbär itä.

Törkiyädä koronavirusqa qarşı “adenovirus” ısulı belän yasalğan vakśinanıñ barlıq variantlardan ozaq waqıt saqlayaçağına ömetlänälär. Anı uylap tapqan Änkara yaman şeş tikşerenüläre institutında 1nçe faza êşçänlekläre bara. Fän yortınıñ mödire, professor Xakan Akbulut: “Bezneñ vakśinabız ilebezdä qullanılğan mPNK häm inaktiv preparatlardan bik ayırılıp tora. Ul yäşi torğan vakśina. Tağın da köçle immun cawabı barlıqqa kiterä ala,”-dide.  

“Hürriyet” gazetı Anadoludan urlanğan äsärlärneñ kire qaytuı turında yaza.

Amerikalı wäqalätlelär 2010nçı yılda qaraqlardan qulğa töşergän Rim çorına qarawçı 21 danä balçıq sawıt xoquqıy prośess tögällängännän soñ uzğan atnada Törkiyägä kiterelde. Anadolu çığışlı tağın 14 äsär Manxetten prokuraturası tarafınnan Törkiyägä cibärü öçen N’yu-York konsullığına tapşırıldı.