Törek matbuğatına küzätü 21.12.2021

“Xäbär Törek” gazetı Afrika belän säwdä külämendä maqsatıbız – 75 milliard dollar dip yaza. Törkiyä ilbaşı Räcäp Tayyip Ärdoğan Törkiyäneň Afrika belän säwdä külämen 5,4 milliard dollardan 30 milliard dollarğa citkerüen, xäzer bu maqsatnıň 50 milliard dollar, annarı 75 milliard dollar buluın belderde. “Tarixında kolonializm ğayebe bulmağan Afrika qıytğası belän tigez partnyerlıq nigezendä xezmättäşlegebezne tağın da nığıtırğa tırışabız” dide ilbaşı.

”Hürriyet” gazetı qazna häm finans ministrı Nureddin Nebatinıň “Törkiyä iq’tisadı uňış qazanaçaq” digän süzlären alğı planğa çığara. “İlbaşıbız açıqlağan törek lirasın nığıtaçaq iskitkeç iq’isadi manifest belän bez qatğıy räweştä yulıbıznı däwam itäbez.Berkem dä şiklänmäsen. İnvestiśiyälär, citeşterü, êş belän täêmin itü häm êksportqa yünälgän Yaňa Törkiyä modele belän Törkiyä iq’tisadı otışlı,tabışlı bulaçaq” dip yazdı Törkiyä qazna häm finans ministrı Nureddin Nebati üzeneň tvitter akkauntında.  

”Sabah” gazetı Törkiyä belän Ärmänstan arasında oçışlar başlıy dip xäbär itä. Törkiyä tışqı êşlär ministrı Mävlüt Çavuşoğlu Törkiyäneň töbäk totrıqlılığı nigezendä ışanıçnı arttıruçı adımnar yasawın assızıqlap, Törkiyä belän Ärmänstan arasında oçışlar başlanaçağın äytte. “Bez Ärmänstan belän üzara bäyläneşne başlaw öçen ike yaqlı maxsus wäkillär bilgelädek. Maxsus wäkillär tiz arada oçraşaçaq. Qayber şirkätlär kiläse könnärdä reysların başlataçaq. Törkiyä Ärmänstanğa qarata adımnarın, qararların Azärbaycan belän kiňäşläşep qabul itä” dide Çavuşoğlu.

”Star” gazetı yazğança, Törkiyäneň Berläşkän Millätlär Oyışmasındağı daimi wäkile Färidun Sinirlioğlu BMO iminlek şurasına reakśiya belderep bolay dide:” Xêşteg äybät tä, läkin ber yortıň bulu yaxşıraq. Tarix bu şuranı xêşteg buını itep tanır dip qurqam. Ay sayın bu şurağa kilep tvitterda närsälärder yazıp kitäbez, kiläse ayda tağın şunı uq qabatlıybız. BMO iminlek şurası - Süriyä xalqınıň soňğı mömkinlege. Bez monıň xätle genä êşli alabızmı? Yaňa yıl qararlarıbız turında tvitterda yazu urınına bälki Süriyä xalqın qotqarır öçen närsäder êşli alırbız”.

”Yeni Şafak” basması Törkiyäneň Afrika häm Aziyädäge 22 ildä 34 meňnän artıq su qoyısı êşläwen uquçıları belän urtaqlaşa. Älege ike qıytğada 18 millionnnan kübräk keşe çista sulı buldı. Yıl sayın xolera, dizenteriya, tif häm êç kitüdän 485 meň keşe ülgän bu cirlärdä çistartu qorılmaları häm çaqrımnarğa suzılğan suütkärgeçlär dä qullanılışqa tapşırıldı.