Törek matbuğatına küzätü 14.12.2021

“Haber Türk” gazetı ministr Çavuşoğlunıñ Ärmänstan belän mönäsäbätlärne caylaw belän bäyle belderüen citkerä.  

Törkiyä tışqı êşlär ministrı Mäwlet Çavuşoğlu Ärmänstan belän mönäsäbätlärne caylaw öçen adımnar yasalaçağın äytte.Yerivan belän ike arada çarter oçışları başlanaçaq. “Tizdän Ärmänstan belän aralarnı cayğa salu öçen ike yaqtan da maxsus wäkil bilgelänäçäk. Här adımnı Azärbaycan belän bergä yasıybız,”-dide ministr.  

“Hürriyet” gazetı “Qara diñgez gazı 2023nçe yılda öylärdä qullanılaçaq” dip citkerä.

Törkiyä ênergetika häm tabiğıy çığanaqlar ministrı Fatix Dönmäz Qara diñgezdä tabılğan gaznıñ citeşterügä keräçäk waqıtın äytte. 2023nçe yılda annan çıqqan zäñgär yağulıq milli sistemağa quşılaçaq häm öylärgä cibäreläçäk.

“Vatan” gazetı Awrupa häm Rusiyädän Törkiyägä turist ağımı turında yaza.

Raştua häm Yaña yıl kanikulları öçen kilüçe turistlar Antaliyädä qışın da açıq bulğan 5 yoldızlı qunaqxanälärne tutıra başladı. Bäyrämçä bizälgän otel’lär 100% tulılıq bulaçağın kötä.

“Sabah” gazetı xäbär itkänçä, Törkiyädä citeşterügä nigezlängän üseş prośessı tizlände.

Törkiyädä sänäğat’ citeşterüendä yıllıq bazada özleksez 17 ay üseş buldı. Sänäğat’, tözeleş, säwdä häm xezmät kürsätü tarmaqlarında tovar äyläneşe indeksı oktyabr’ ayında yıllıq 47,5%qa arttı. Çit il investorlarınnan uzğan yılnıñ berençe 10 ayında kilgän 4 milliard 480 million dollar külämendäge turıdan-turı kertemnär bıyılnıñ şul uq çorında 6 milliard 359 million dollarğa citte.  

“Star” gazetı “Töreklär uylap tapqan akkumulyator başqalarınnan ayırılıp tora” dip yaza.

İzmir yuğarı texnologiyälär institutında êlektrlı maşinalarğa tiz tok yökläw waqıtında akkumulyatorlarnıñ cılınuı häm ğomere qısqaru problemasın çişärgä buldılar. Monıñ öçen cılılıqnı balanslawçı häm qurqınıçsız räweştä tiz êlektr yökli aluçı batareya sistemasınıñ prototibı uylap tabıldı.