Törek matbuğatına küzätü 24.03.2021

”Xörriyӓt” gazetı Törkiyӓ ilbaşı Rӓcӓp Tayyip Ӓrdoğannıň İtaliya prem’yer-ministrı Mario Dragi belӓn telefonnan söylӓşüe hӓm Germaniya kanślerı Angela Merkel belӓn videokonferenśiya ütkӓrüe turında yaza. Ӓrdoğan hӓm Dragi  ike il arasındağı sӓwdӓ külӓme, migraśiya krizisı, viza irege hӓm regional’ mӓs’ӓlӓlӓr xaqında söylӓşte. Merkel belӓn söylӓşüdӓ isӓ Ӓrdoğan Töriyӓneň Ӓgӓydӓ hӓm Könçığış Urta diňgezda kiyerenkelek yaqlı tügel, xezmӓttӓşlek yaqlı buluına basım yasadı, dialognı uňışlı rӓweştӓ dӓwam itterü öçen Greśiyӓne tӓşwiq’ itü kirӓklegen citkerde.

”Sabah” gazetı “Reuters” xӓbӓr agentlığınıň bu atnada ütkӓrelӓçӓk Awrupa Berlege liderlar sammitınıň yomğaqlaw beldergese proyektına nigezlӓnep birgӓn xӓbӓrendӓ citkergӓnçӓ, liderlar Awrupa Berlege komissiyӓsenӓ Törkiyӓ belӓn Tamğaxanӓ Berlege yaňartu söylӓşü wӓqalӓten birü öçen tırışaçaq. Liderlar süriyӓlelӓrne sıyındırğan öçen Törkiyӓgӓ tağın da kübrӓk matdi yӓrdӓm kürsӓtügӓ basım yasayaçaq. Şulay uq Törkiyӓ belӓn Awrupa Berlege arasında yuğarı dӓrӓcӓdӓge cıyılışlar hӓm diplomatik êlemtӓlӓr köçӓytelӓçӓk.

“Yaňa Şafak” gazetı  Törkiyӓ tışqı êşlӓr ministrı Mӓvlüt Çavuşoğlunıň Bel’giya başqalası Bryussel’dӓ NATO tışqı êşlӓr ministrları cıyılışında çığış yasawın, “PKK/YPG” separatist terror oyışmasınıň Ğıyraq hӓm Süriyӓgӓ qurqınıç tudıruı turında ӓytüen citkerӓ.  Ministr Törkiyӓneň barlıq terror oyışmaları belӓn körӓşne dӓwam itӓçӓgen belderde hӓm Törkiyӓneň Ӓfganstanda tınıçlıq barışı öçen yuğarı dӓrӓcӓle cıyılışnı üzendӓ ütkӓrӓçӓgen ӓytte.

“Star” gazetı Qıtay tışqı êşlär ministrı Van İ neň 24 – 26nçı mart könnӓrendӓ Törkiyägä säfär yasayaçağın citkerӓ. Bu xaqta Törkiyä tışqı êşlär ministrlığınnan yazmaça belderü yasaldı.“Söyläşülärdä ike yaqlı mönäsäbätlärdän tış regional’ häm xalıqara könüzäk temalar kütäreläçäk” diyelä anda.Qıtay tışqı êşlär ministrı Van İnı ilbaşı Räcäp Tayyip Ärdoğan da qabul itӓr dip kötelӓ.

”Xӓbӓr Törek” gazetı Törkiyӓ tışqı êşlӓr ministrlığınıň Bangladeşta arakanlı möselman möhacirlär toruçı lager’ – Koks Bazardağı yanğında ğomeren yuğaltuçılar öçen qayğı urtaqlaşuı turında yaza.”Törkiyӓ Roxinca qaçaqları öçen barlıq ölkӓlӓrdӓ dӓ humanitar yӓrdӓm êşlӓren dӓwam itӓçӓk” diyelӓ ministrlıq belderüendӓ.