Төрeк мaтбугaтынa күзәтү - Törek matbuğatına küzätü 04.02.2021

“Xäbär Türk” gazetı: “Ärdoğannan yana töp qanun çaqıruı”

İlbaşı Räcäp Tayyip Ärdoğan uzğan könnärdä yasağan yaña konstituśiya çaqıruın qabatladı. Uñay öleşen kertergä teläwçe härkemne yaña töp qanun êşçänlegendä kürergä teläwlären belderüçe Ärdoğan: “Bu konstituśiya İlbaşı xökümäte sisteması häm tarixi adımnar östendä salınaçaq. Xäzerge töp qanunnı çitkä quyıp, yaña grajdanlıq konstituśiyası östendä êşläw kiñ ofıqlarnı da açaçaq,” – dip äytte.

“Watan” gazetı: “Törkiyä AQŞ häm Rusiyä arasındağı kileşüdän qanäğät”

Törkiyä Amerika Quşma Ştatları häm Rusiyäneñ Strategik qorallarnıñ azaytıluı (Yaña Start) kileşüen 5 yılğa ozınaytu qararın qanäğät bulıp qarşılawın citkerde. Tışqı êşlär ministrlığı süzçese Hami Aqsoy yasağan yazma belderüdä: “Yasalğan şuşı möhim adımnıñ qorallarnıñ kontrol rejimınıñ köçäytelüenä häm global’ iminlekkä qağılışlı sınawlar belän köräşkä öleş kertüen telibez”, - dip äytte.

“Xörriyät” gazetı: “AQŞ: “Törkiyä citdi potenśialğa iyä citeşterü märkäze””

Amerika Quşma Ştatlarınıñ Änkara tulı wäqalätle ilçese Dêvid Satterfild ileneñ Törkiyä belän arasındağı nigezle häm uñışlı säwdä êlemtälärenä bäylelegen däwam itterüen, xäzerge säwdä bağlanışların köçäytergä teläwen belderde. Satterfild: “Törkiyäneñ kapital salu şartlarınıñ iñ uñay yaqları – ilneñ uñay xalıq sanı häm üze urnaşqan töbäktäge küp sanda bazarğa ireşüne täêmin itüçe möhim geografik wazğiyäte”, - dip äytte.

“Yäni Şafak” gazetı: “Bıyıl “Texnofest”tä 35 törle nominaśiyädä texnologiya bäygeläre bar”

Dön’yanıñ iñ zur aviaśiya, ğaläm häm texnologiya festivale “Texnofest”nıñ dürtençese 2021nçe yılnıñ 21nçe-26nçı sentäbr’ könnärendä İstanbul Atatörek hawa mäydanında uzaçaq. Festivaldä uzğan yıldan ayırmalı bularaq qatnaş simulyaśiyälär, êlemtä texnologiyaları, suğışuçı keşesez hawa apparatları, yasalma aqıl, mädäniyät häm turizm texnologiyaları, awıl xucalığı öçen keşesez ciröste maşinası, sänäğättä sanlı texnologiyalär bäygeläre täwge tapqır oyıştırıla.

“Star” gazetı: “Dön’ya bankınnan Törkiyägä rekord investiśiya”

Uzğan yıl Törkiyägä kertelgän investiśiyälär xaqında açıqlaw yasawçı Dön’ya bankı tuplam miqdarı 2 milliard yarım dollarğa citkän 9 kritik üseş proyektı öçen finanslaw qullandıruın belderde. Dön’ya bankınıñ Törkiyä direktorı Auguste Tano Kouame Dön’ya bankınıñ 2021nçe yılda da Törkiyäneñ sośial’ häm iq’tisadi üseşeneñ däwam itelä alınuı öçen ixtıyac toyılğan qorılışlarnıñ köçäytelüenä öleş kertüen däwam itäçägen belderde.