Törek matbuğatına küzätü 07.10.2020

“Sabah” gazetı “Ärdoğan Makronğa ut çäçte” dip yaza.  

Törkiyä ilbaşı Räcäp Tayyip Ärdoğan kiçä Mäçetlär häm din ähelläre atnası programmasında İslamğa qarşı doşmanlıqnı tänqıyt’läde. Ul beroçtan Franśiyä ilbaşı Êmmanuêl’ Makronnıñ tawış quptarğan süzlärenä rizasızlıq ta belderde. “İslamnı strukturalaştıru turında söyläşü ädäpsezlek, tupaslıq. Sin “islamnı strukturalaştıru” süztezmäsen äyterlek kem soñ äle?”-dide Törkiyä liderı.

“Star” gazetı Ärdoğannıñ “Yabulı Maraş tulısınça qullanılışqa açılır dip ömetlänäbez” digän süzlären yaza.

Törkiyä ilbaşı Räcäp Tayyip Ärdoğan häm Tön’yaq Kipr törek cömhüriyäte xökümäte räise Ärsin Tatar kiçä TKTC su täêminatı proyektı ütkärgeçlären êşlätep cibärü çarasında çığış yasadı. Anda Tatar pänceşämbe könne Kipr törekläreneñ 46 yıl yabulı bulğan häm kerü tıyılğan Maraş şähäre qomlıqlarınnan faydalana başlayaçağın belderde. Törkiyä ilbäşı älege yañalıqnı xupladı. “Maraşnıñ TKTC cirläre buluı – çınbarlıq. Anıñ diñgez yarın xalıqnıñ qullanuı öçen açu qararın yaqlıybız. Şähärneñ tulısınça açıluına ömetlänäbez,”-dide ul.

“Haber Türk” gazetı Çavuşoğlunıñ “Bolay barmayaçağın böten dön’ya añlarğa tiyeş” digän süzlären alğı planğa çığara.

Törkiyä tışqı êşlär ministrı Mäwlet Çavuşoğlu kiçä Azärbaycannıñ başqalası Baqığa säfäre waqıtında Tawlı Qarabaxtağı bäreleşlär belän bäyle belderülär yasadı. “Nişlärgä belmäwçe Ärmänstan toraq punktlarğa ut aça başladı. Bu keşelek cinayäte – Ärmänstannıñ çarasızlığınıñ kürsätkeçe. Minsk törkeme illäre basıp aluçı belän qorban bulğan däwlätne ber ük däräcädä tottı. Bolay barmayaçağın böten dön’ya añlarğa tiyeş,”-dide ul.

“Hürriyet” gazetı ilbaşı idaräse süzçese Kalınnıñ belderüen citkerä.

İbrahim Kalın xalıqara cämäğat’çelekneñ Azärbaycan cirläreneñ qayçan azat iteläçäge belän bäyle kalendar’ bilgeläwe kiräklegen, bu mäs’älädä Minsk törkemeneñ dä qulınnan kilgänne êşlärgä tiyeşlegen belderde. “Êşli almasa, kiräk ikän Minsk törkeme urınına başqa mexanizmnar, al’ternativ oyışmalar sınap qarasın,”-dide ul.  

“Vatan” gazetı Ukrainanıñ Törkiyädän 48 danä qorallı dron alırğa teläwe turında citkerä.

Ukrainanıñ däwlät qoral belän säwdä şirkäte citäkçese Vadim Nozdriya Bayraktar TB2 qorallı keşesez hawa apparatların üzlärendä bergäläp çığaru belän qızıqsınuların belderde. Monnan tış, ul 48 danä dronnı satıp alırğa uylawların da äytte.