Törek matbuğatına küzätü 02.09.2020

“Yenişafak” gazetı Ärdoğannıñ Könçığış Urta diñgez belän bäyle ähämiyätle belderülären alğı planğa çığara.

 Törkiyä ilbaşı Räcäp Tayyip Ärdoğan Bäştäpädä oyıştırılğan 2020-2021nçe yustiśiyä yılı açılış tantanasında çığış yasap bolay dide: “Tarix buyınça gel başqalarnıñ artına ışıqlanıp yäşägän däwlätne qarşıbızğa quyıp üzeneñ yaşeren ğamällären tormışqa aşırırğa mataşuçılarnıñ êşläre iñ zur ğadelsezlekter. Bez bu külägä uyınınnan tuydıq inde. Üze öçen dä ber xäyere bulmağan däwlätne Törkiyä şikelle regional’ häm global’ köçneñ qarşına quyıp, cim bularaq qullanu kölke bula başladı”.

“Star” gazetı Törkiyäneñ Meis utrawı belän bäyle belderülären yaza.  

Törkiyä tışqı êşlär ministrı Mäwlet Çavuşoğlu: “Bez Könçığış Urta diñgezdä barısı belän ber östäl artına utırıp, söyläşep, härkem öçen ğadel räweştä büleşü öçen urtaq çara tabu yaqlı. Meis utrawında tiyeşennän artıq qorallanu bulsa, yuğaltuçı yaq Greśiyä bulaçaq,”-dide.

“Vatan” gazetı ilbaşı idaräse süzçese Kalınnıñ Avstriyägä ironiyäle cawabı turında yaza.  

İlbaşı idaräse süzçese İbrahim Kalın Twitter akkauntı aşa Avstriya integraśiyä ministrı Syuzanna Raabnıñ Törkiyäneñ Avstriyädäge töreklärgä yoğıntı yasap, bu däwlätne bülergä teläwe turındağı fikerlärenä bolay dip cawap birde: “Barı Avstriyäne genäme? Bulmas…”  

“Hürriyet” gazetı Germaniyä säyäsätçeläreneñ Törkiyä turizmın maqtawların yaza

Germaniyäneñ êlekkege xökümät räise Xel’mut Kol’nıñ kiñäşçese bulğan, Xristian demokrat partiyäse äğ’zası, jurnalist  Fridxel’m Ost Törkiyädäge kiçereşlären häm turizm tarmağındağı koronavirusqa qarşı çaralarnı maqtaw tulı cömlälär belän añlattı. “Germaniyäneñ Tön’yaq häm Baltıyq diñgeze yarlarındağı yal urınnarı häm Mayorka belän çağıştırğanda, Törkiyädä kürelgän çaralar dön’yağa ürnäk bulırğa tiyeş,”-dide Ost.

“Sabah” gazetı “Antaliyägä ber ayda 11 meñ oçış” dip yaza.  

Antaliya aêroportı koronavirus waqıtında soñğı 1 ayda 11 meñ oçışnı qabul itte. 31 däwlättän 1 million 750 meñ yulçığa xezmät kürsätelde.