Törek matbuğatına küzätü 27.08.2020

”Xörriyӓt” gazetı “İlbaşı Ӓrdoğannan kisken süzlӓr” isemle xӓbӓrendӓ Törkiyӓ ilbaşı Rӓcӓp Tayyip Ӓrdoğannıň kiçӓ Muşta Malazgirt ciňüeneň 949 yıllığı uňayınnan  oyıştırılğan programmada çığış yasawı turında yaza.

Ӓrdoğan üz çığışında tübӓndӓgelӓrne citkerde: “Qurqunıň ülemgӓ bernindi faydası yuq.Törkiyӓ Urta diňgezdӓ dӓ, Ӓgӓydӓ hӓm Qara diňgezdӓ dӓ üz xaqın alaçaq. Monıň öçen bez xӓrbi, iq’tisadi, sӓyӓsi yaqtan kirӓk bulğannı êşlӓyӓçӓkbez. Ӓňgӓmӓdӓşlӓrebezne üzlӓren tӓrtipkӓ kiterergӓ, yalğışlardan yıraq torırğa çaqırabız”.

 
”Xӓbӓr Törek” gazetı “Antaliyӓgӓ 3 köndӓ 100 meň turist kilde” isemle yazmasında citkergӓnçӓ, Törkiyӓneň turizm üzӓge Antaliyӓgӓ 3 köndӓ çit illӓrdӓn 510 oçqıç belӓn 100 meň yulçı kilde. Antaliya hawa mӓydanı ğomum mödire Deniz Varol: “Bu bik möhim kürsӓtkeç. Yıl başınnan birle xalıqara reyslar belӓn Antaliyӓgӓ 1 million 300 meň turist kilde. Monıň yartısı avgustta tormışqa aştı”,- dide.
 

”Vatan” gazetı “Rusiya Törkiyӓ belӓn urtaq boralaq êşlӓp çığaruğa uňay qarıy” isemle xӓbӓrendӓ yazğança,  Rusiya boralaqları ğomum mödire Andrey Boginskiy Törkiyӓ belӓn boralaq texnologiyӓlӓre hӓm citeşterüdӓ xezmӓttӓşlekkӓ ӓzer buluların belderde. Boginskiy: "Mӓs’ӓlӓ bazar torışı hӓm citeşterelӓçӓk êşlӓnmӓlӓrneň kilӓçӓge belӓn bӓyle. Bu tarmaqta xezmӓttӓşlek xaqında söylӓşergӓ ӓzerbez”,-dide.

”Star” gazetı “IMF dӓn törek iq’tisadçığa yuğarı dӓrӓcӓle wazıyfa” isemle xӓbӓrendӓ Xalıqara valyuta fondı IMFneň strategiya, sӓyӓsӓt hӓm küzdӓn kiçerü bülege citӓkçese itep törek iq’tisadçı Ceyla Pazarbaşıoğlunıň bilgelӓnüen xӓbӓr itӓ. Ul yaňa wazıyfasına 15 nçe sentyabr’dӓ kereşӓçӓk.

”Sabah” gazetı “Küllüobada 5 meň yıllıq buyaw palitrası tabıldı” isemle xӓbӓrendӓ Törkiyӓdӓ İskeşӓhӓrneň Seyitgazi ilçӓsendӓ 1996 nçı yıldan birle dӓwam itkӓn Küllüoba qazu êşlӓrendӓ taştan yasalğan 5 meň yıllıq buyaw palitrası tabıluın uquçıları  belӓn urtaqlaşa. Palitra qasӓlӓrne buyaw öçen qullanılğan dip farazlana.