Törek matbuğatına küzätü 15.04.2020

 “Xӓbӓr Törek” gazetı “İlbaşı Ӓrdoğan Tön’yaq Kipr Törek Cömhüriyӓte prem’yer-ministrı belӓn telefonnan söylӓşte” isemle xӓbӓrendӓ Törkiyä ilbaşı Räcäp Tayyip Ärdoğannıň Tön’yaq Kipr Törek Cömhüriyӓte xökümät räise Ärsin Tatar belän telefon aşa söyläşüe turında yaza. İlbaşı idaräseneň êlemtӓ bülege beldergӓnçӓ, Ӓrdoğan Tön’yaq Kipr Törek cömhüriyätenä koronavirus belän köräştä yärdäm iteläçägen belderde. Söylӓşüdӓ ike yaqlı mönäsäbätlär häm regional’ mäs’älälär dӓ telgä alındı.

”Sabah” gazetı ”BMO iminlek şurası koronavirus mӓs’ӓlӓse xaqında söylӓşergӓ  soňğa qaldı” isemle xӓbӓrendӓ Törkiyӓ tışqı êşlӓr ministrı Mӓvlüt Çavuşoğlunıň Berlӓşkӓn Millӓtlӓr Oyışması iminlek şurasınıň koronavirus mӓs’ӓlӓsen qarawda bik soňğa qaluı turında ӓytüen citkerӓ. Ul kiçӓ üzӓge Vaşingtonda urnaşqan töşençӓ oyışmaları hӓm Törek miras waqıfı urtaq oyıştırğan videokonferenśiyӓdӓ qatnaşıp Törkiyӓneň hӓrwaqıt BMO iminlek şurasında reforma ütkӓrü yaqlı buluına basım yasadı.

”Vatan” gazetı ”Tӓwge tapqır Törkiyӓdӓn qullanıldı” isemle xӓbӓrendӓ NATO ğomum sӓrqӓtibe Yens Stoltenbergnıň Kovid -19 belӓn körӓşkӓ basım yasap ,NATO koll-üzӓgeneň tӓwge tapqır Törkiyӓdӓn Angliyӓgӓ yӓrdӓm ireşterüne ciňelӓytü öçen qullanıluı turında ӓytüen citkerӓ.

“Xörriyӓt” gazetı “THY xalıqara reysların ğamӓldӓn çığardı” isemle xӓbӓrendӓ yazğança, Törek hawa yulları (THY) aviakompaniyӓse koronavirus global’ kizüe arqasında rӓsmi oyışmalar qararları hӓm saqlıq çaraları nigezendӓ barlıq xalıqara reysların 20 nçe mayğa qadӓr tuqtatuın belderde.

”Star” gazetı “Kipterelgӓn incir êksportı arta” isemle xӓbӓrendӓ citeşterü hӓm êksportta dönya liderı bulğan Törkiyӓneň bu sezonda 180 million dollar külӓmendӓ kipterelgӓn incir satuın xӓbӓ itӓ. Ӓgӓy êksportçılar assośiyӓśiyӓse mӓğ’lümatlarına kürӓ, 26 nçı sentyabr’dӓn 4 nçe aprel’gӓ qadӓrge dӓwerdӓ çit illӓrgӓ 50 meň 822 tonna incir cibӓrelde hӓm monnan 179 million 954 meň dollar tabış alındı.