Törek matbuğatına küzätü 30.01.2020

“Xörriyät” gazetı Ärdoğannıñ süzläre belän “Qudüsneñ İzrailgä birelü planı berqayçan da qabul itelä almas” dip yaza.

Törkiyä ilbaşı Räcäp Tayyip Ärdoğan AQŞ däwlät başlığı Donal’d Trampnıñ tınıçlıq planı belän bäyle bolay dide: “Qudüs möselmannarı qağılğısız. Qudüsneñ İzrailgä birelü planı berniçek tä qabul itelä almas. Bu fälästinlelärneñ xaqların yuqqa çığaru häm İzrailneñ basıp aluın qanunlaştıru planı. İğ’lan itelgän plan tınıçlıq häm çişeleşkä xezmät itmäyäçäk”.

“Sabax” gazetı ministr Çavuşoğlunıñ Bel’giyä belderüen citkerä.

Törkiyä tışqı êşlär ministrı Mäwlet Çavuşoğlu Bel’giyädä däwam itüçe “Ariadna däğ’wası”sında Yuğarı mäxkämäneñ separatist terrorçı oyışma PKKnı tikşerü belän bäyle qararına rizasızlıq belderde. Ul Twitter säxifäsendä bolay dip yazdı: “Bel’giyä mäxkämäseneñ terrorçı oyışma PKK belän bäyle qararınıñ xoquq belän bernindi bäyläneşe yuq. Bu qarar ideologik häm säyäsi”.

“Watan” gazetı İbrahim Kalınnıñ “Fälästin cirläre satulıq tügel” digän süzlären alğı planğa çığara.

Törkiyä ilbaşı idaräse süzçese İbrahim Kalın AQŞnıñ Fälästin-İzrail mäs’äläsen çişü öçen xäzerlägän planı turında “Qudüs bezneñ uzıp bulmayaçaq çigebez häm Fälästin cirläre satulıq tügel” dide.    

“Star” gazetı “Qıtaynıñ Xubêy provinśiyäsennän Törkiyä watandaşların êvakuaśiyäläw öçen êşçänlek başlandı” dip xäbär itä.

Törkiyä tışqı êşlär ministrlığı Qıtayda başlanğan yaña tip koronavirus säbäple kizü iñ nıq taralğan cirlektäge töreklärne ilgä alıp qaytu öçen êşçänlek başlanuın häm sälamätlek saqlaw ministrlığınıñ kiräkle xäzerleklärne kürüen belderde.

“Xäbär Türk” gazetı yazğança, “İq’tisadi ışanıç indeksı 97,1 buldı”

Törkiyä statistika oyışması ğıynvar ayı iq’tisadi ışanıç indeksı mäğ’lümatların belderde. Ul 2019nçı yılnıñ dekabr’ ayında 96,5 ide, ğıynvarda 0,6%qa artıp 97,1 kürsätkeçenä ireşte.