Törek matbuğatına küzätü 10.09.2019

”Sabah” gazetı “Törkiyäneñ Könçığış Urta diñgez yullaması” isemle yazmasında Törkiyä tışqı êşlär ministrı Mävlüt Çavuşoğlunıñ beräwneñ dä Törkiyäneñ Könçığış Urta diñgezdäge êşçänleklären totqarlamayaçağı turında äytüen citkerä. Xäbärdän kürengänçä, Çavuşoğlu kiçä Tön’yaq Kipr Törek Cömhüriyätenä säfäre qısasında watandaşlar belän oçraşuda yasağan çığışında Törkiyäneñ ikelänüsez Tön’yaq Kipr xalqı yanında buluın häm monnan soñ da yanında bulaçağın belderde.

”Star” gazetı “Törkiyä ministrı AQŞ säwdä ministrı Ross belän küreşte” isemle yazmasında Törkiyä qazna häm finans ministrı Bärat Albayraknıñ kiçä Amerika Quşma Ştatları säwdä ministrı Uilbur Ross belän küreşüen xäbär itä. Bärat Albayrak İstanbulda uzğan oçraşu xaqında twitter aşa tübändägelärne citkerde:”Ross belän Törkiyä – AQŞ arasındağı iq’tisadi häm säwdä xezmättäşlege xaqında söyläştek , oçraşu bik näticäle uzdı. İke il arasında säwdä külämen 100 milliard dollarğa citkerü mäs’äläsendäge qatğıylıqqa tağın ber tapqır basım yasadıq”.

”Vatan” gazetınıñ “İyül’ ayında turistik urınnarda qalu kürsätkeçläre” isemle xäbärennän kürengänçä Törkiyädä iyül’ ayında turistik ob’yektlar 75% külämendä tuldı. Mädäniyat häm turizm ministrlığı mäğ’lümatlarına kürä ağımdağı yılnıñ 7 ayında älege ob’yektlarnıñ tulılıq däräcäse 50,68% täşkil itte.  

”Xäbär Törek” gazetı “Yaña ölgergän ciläk –cimeş häm yäşelçä êksportında lider – Rusiya” isemle xäbärendä Törkiyäneñ  bıyılnıñ 8 ayında 114 ilgä 1 million 964 meñ 812 tonna yaña ölgergän ciläk -  cimeş häm yäşelçä êksportlawın häm monnan 1 milliard 207 million 84 meñ 507 dollar tabış aluı turında yaza. Êksportta berençe urında Rusiya tora.

”Xörriyät” gazetı “Yaman şeşkä qarşı köräştä uñışqa ireşü arttı” isemle xäbärendä Germaniyanıñ Kel’n qalasında yäşäwçe törek tabibı Yadigar Genç häm törkemeneñ yaman şeşkä qarşı köräştä immunoterapiya ısulı belän yaña däwalaw alımı uylap tabuın uquçıları belän urtaqlaşa.