Törek matbuğatına küzӓtü 04.09.2019

“Sabah” gazetı İzmirdӓge ber açılış tantanasında qatnaşqan Törkiyӓ Saqlanu ministrı Xulusi Akarnıñ Amerika Quşma Ştatları belӓn dӓwam itüçe imin töbӓk êşçӓnleklӓrenӓ tuqtaluın yaza.

Xӓbӓrdӓ ministr Akarnıñ tübӓndӓge süzlӓre urın ala: “Bezgӓ birelgӓn süzlӓrneñ cirenӓ citkerelüen küzӓtӓbez. Alarnı ütӓwdӓ citeşsezlek bulıp, cirenӓ citkerelmӓsӓ, Törek qorallı köçlӓrebezneñ, Törkiyӓ Cömhüriyӓte dӓwlӓteneñ ikençe planı da bar, öçençe planı da. Alarnı çınğa aşırırbız.”

“Watan” gazetı beldergӓn Qazna hӓm finans ministrı Berat Albayrak avgust ayında inflyaśiyada möhim tübӓnӓyüneñ küzӓtelüen ӓytte.

Gazet ministrnıñ tübӓndӓge süzlӓren uquçıları belӓn urtaqlaşa: “Citeşterüçe bӓyӓ indeksındağı tübanӓyü inflyaśiyadage töşüne dӓwam itterӓ. İnflyaśiya belӓn körӓş hӓm yaxşı üseş östenlekle sӓyӓsӓtlӓrebez belӓn barlıq ölkӓlӓrdӓ maqsatlarıbızğa ireşӓçӓkbez.”

“Xörriyӓt” gazetı “Törek hawa yullarınnan bilet kampaniyase” isemle xӓbӓrendӓ Törek hawa yullarınıñ transfer üzӓge bulğan İstanbul aêroportınnan Angliya, İrlandiya, Rusiyӓ, Norvegiya, Şveśiya, Daniya, Finlyandiya, Latviya, Litva hӓm Êstoniyadӓge 26 urınğa barıp qaytu öçen 164 dollardan başlanuçı bӓyӓlӓr belӓn oçunı tӓqdim itüen citkerӓ.

“Star” gazetı Törkiyӓ Aviaśiya hӓm ğalӓm sӓnӓgӓte akśionerlık cӓmğiyӓte yasağan Şimşek yuğarı tizlekle oçqıç sistemasınıñ berençe tapqır çit ildӓ qullanılaçağın yaza.

Xӓbӓrgӓ kürӓ ӓlege sistema 11 sentӓbr’ könenӓ qadӓr baraçaq Xӓrbi xezmӓttӓşlek 2019 xӓrbi künegülӓrendӓ qullanu öçen Qazaqstanğa cibӓrelde.

“Xӓbӓr türk” gazetı kruiz köymӓseneñ möhim üzӓklӓrennӓn bulğan Aydınnıñ Kuşadası ilçӓsenӓ kiçӓ 3 köymӓdӓ barlığı 4230 yulçınıñ kilüen citkerӓ.

Gazet yazuınça Bagama bayraqlı “Marella Discovery 2” 1850 yulçı, Mal’ta bayraqlı “Celestyal Olympia” 1674 yulçı hӓm Bagama bayraqlı “Seven Seas Voyager” isӓ 706 yulçısı belӓn Kuşadası Ege portına kilep tuqtadı.