Törek matbuğatına küzätü 28.02.2019

“Yaña Şafak” gazetınıñ  “Trampnıñ kiyäwe häm baş kiñäşçese Djared Kuşner Änkarada” isemle xäbärennän kürengänçä ,Amerika Quşma Ştatları ilbaşı Donal’d Trampnıñ kiyäwe häm baş kiñäşçese Djared Kuşner kiçä Törkiyägä kilde.

Törkiyä ilbaşı Räcäp Tayyip Ärdoğan Djared Kuşnernı Bäştäpädä qabul itte. Anda qazna häm finans ministrı Bärat Albayraq ta qatnaştı.Albayrak “Kuşner belän oçraşuda ike il arasında iq’tisadi xezmättäşlekne üsterü adımnarı xaqında söyläştek”dide.

”Sabah” gazetı ”İq’tisadi ışanıç indeksı arttı” isemle xäbärendä Törkiyä statistika oyışmasınıñ fevral’ ayınıñ iq’tisadi ışanıç indeksın açıqlawı turında yaza.

Mäğ’lümatlardan kürengänçä, iq’tisadi ışanıç indeksı bu ayda annan êlekke ay belän çağıştırğanda 1,2%qa artıp 79,7 täşkil itte.

”Star” gazetınıñ “Törkiyädän Rusiyägä limon êksportı 1 ayda 10 million dollarnı uzıp kitte” isemle xäbärendä citkerelgänçä, ağımdağı yılnıñ berençe ayında Törkiyädän Rusiyägä 18 meñ 60 tonna limon satıldı,annan 10 million 172 meñ 644 dollar tabış alındı.

Uzğan yıl Rusiyägä bu däwerdä 13 meñ 69 tonna limon êksportlanğan häm ul 8 million 969 meñ 50 dollar tabış kitergän.

Älege kürsätkeçlärne çağıştırğanda şul kürenä: Rusiyägä limon êksportı miq’dar cähätennän 38%qa, qıymmät cähätennän 13,4%qa artqan.

”Vatan” gazetı ”Törkiyäneñ yal itü  maqsatlı täwge biologik buası açıla” isemle xäbärendä Törkiyäneñ yal itü maqsatlı berençe biologik buasınıñ Ärzurumnıñ Aziziyä ilçäsendä açılaçağın xäbär itä.

 Anıñ il iq’tisadı häm turizmına öleş kertüe kötelä. Buanıñ ozınlığı 1115 metr bulaçaq.

”Xäbär Törek” gazetı ”Dönyanıñ iñ yaxşı 25 qunaqxanäse bilgelände, isemlektä Törkiyädän dä 2 qunaqxanä bar” isemle xäbärendä “TripAdvisor” säyäxätçeläreneñ tawış birüe belän bilgelängän "Travelers’ Choice 2019" isemlegendä dönyanıñ iñ yaxşı 25 qunaqxanäse arasına Törkiyädän dä 2 qunaqxanäneñ kerüen uquçıları belän urtaqlaşa.

İsemlektäge 2 Törkiyä qunaqxanäseneñ berse İstanbulda, ikençese Kapadokiyada urnaşqan.