Törek matbuğatına küzätü 25.02.2019

“Xörriyät” gazetı “Ğıyraqnıñ tön’yağına hawa xäräkäte” turında yaza

Törkiyä milli saqlanu ministrlığı Ğıyraqnıñ tön’yağına oyıştırılğan hawa xäräkätendä terrorçı oyışma ob’yektlarınıñ yuqqa çığarıluın belderde. Twitter xisabınnan yasalğan räsmi açıqlawda yazılğança, Xakurk häm Zap töbäklärendäge operaśiyä waqıtında separatistlarnıñ qoral saqlağıçları, sıyınu urınnarı häm depoları utqa totılğan.

“Star” gazetı Akarnın süzläre belän “Münbiç häm Färatnıñ könçığışın terrorçılardan çistartu öçen plannarıbız äzer” dip belderä

Milli saqlanu ministrı Xulusi Akar äytüençä, Münbiç häm Färatnıñ könçığışın terrorçılardan çistartu, çiklärneñ iminlegen täêmin itü häm süriyälelärne isän-imin öylärenä qaytaru öçen barlıq plannar äzerlängän. “Waqıtı häm säğate citkäç xörmätle ilbaşıbıznıñ direktivası belän bu plannar tormışqa aşırılaçaq,”-dide ul.

“Sabax” gazetı yazğança, “Törkiyä hawa yulları İstanbul aêroportınnan 272 meñ 821 yulçı alıp kitte”

Törkiyä hawa yulları İstanbul aêroportında täwge tariflı säfärlär başlanğan könnän - 2018nçe yılnıñ 31nçe oktyabrennän alıp 2 meñ 173 oçış yasadı belän tuplam 272 meñ 821 yulçını üz bortlarına aldı.

“Yaña Şäfaq” gazetı “Ayaq kiyeme tarmağı Rusiyägä yünälde” dip xäbär itä

25nçe-28nçe fevral’dä Mäskäwneñ Sokol’niki parkında “Euro Shoes Premiere Collection” kürgäzmäse uza. Anda Törkiyädän ayaq kiyemnäre çığaruçı 13 şirkät qatnaşaçaq. Alarnıñ maqsatı êksportnı arttıru.

“Watan” gazetı “ Xobbi bularaq başladı - 7 ilgä cibärä” di

Törkiyäneñ Tokat töbägendä Adnan Dämir isemle ber keşe dekorativ tawıqlar ürçetä. Xäzer ul qoşlarnıñ yomırqaların çit illärgä sata başladı. Bu êşne sośial’ media aşa alıp bara. Dekorativ tawıqlarnıñ tösle yomırqalarına qızığuçılar küp. “Yomırqalarnı zakaz buyınça cibäräm. Başta Törkiyä külämendä ide. Xäzer çit illärgä dä açıldım. 7 ilgä yomırqa cibärdem inde,”-dip söyli Adnan Dämir.