Törek matbuğatına küzätü 13.02.2019

“Yaña Şäfaq’” gazetı yazğança, “Törkiyä DEAŞ belän PKK arasındağı pıçraq süz quyışunı açıqladı”

Êçke êşlär ministrı Söläyman Soylu ber atna êlek Törkiyädä êläkterelgän bombalı maşinanıñ artında pıçraq kileşü toruı turında belderde. Anıñ äytüençä, älege tozaqnı qorırğa teläwçelär häm alarğa çik tışınnan täğ’limat birüçelär êläkterelde. Höcüm planın yasawçı terrorçı DEAŞlı. Ul soraw alu waqıtında beldergänçä, separatist terrorçı oyışma YPG/PKKnıñ qulındağı DEAŞ äğ’zası 100 terrroçını irekkä çığaru öçen kileşü tözelgän.

“Xäbär Türk” gazetı “Hawadan şul uq waqıttağı küreneşne tapşıruçı cirle dron yasaldı” dip yaza

Cirle texnologiyä êlemtä operatorı şirkäte Turkcell 5G belän kontrol’ itelüçe häm 360 graduslı 4K surätne turıdan-turı śifrlı çınbarlıq küzleklärenä tapşıra aluçı cirle dron yasap çığardı. Bu çişeleş näticäsendä industrial’ mäydanda neft’ häm gazütkärgez çeltärlären kontrol’ itü awıl xucalığı tarmağında qırlarnı tikşerü şikelle êşçänleklärne başqarırğa mömkin. Monnan tış, śifrlı çınbarlıq küzleklärenä konśert yäisä başqa çaralarnı turıdan-turı hawadan tapşırıp bulaçaq.

“Watan” gazetı “Trak’yada slaneś gazı turında söyeneçle xäbär” dip yaza

Törkiyäneñ ênergetika tarmağındağı investiśiyäläre häm yaña mäydannarnı êzläw êşçänlege bar köçenä däwam itä. Anıñ cimeşläre dä kürenä başladı. Trak’yadağı Könbatış Çältik - 1 skvajinasında tabiğıy gaz tabılu yaña prośessqa nigez saldı. Ênergetika belgeçläre fikerençä, cirlektä töp söyeneç slaneś gazı bulaçaq. Älege mäydanda açıqlanğan 3 milliard kubometr tabiğıy gazdan yaqınça 60 tapqır kübräk slaneś gazı bar.   

“Star” gazetı yazğança, “Törkiyädä cil ênergiyäse tarmağında uzğan yıl 650 million dollar investiśiyä yasaldı”

Xisapqa qarağanda, Törkiyäneñ cil ênergiyäse köçe uzğan yıl 497 megavattqa arttı. Şulay itep, ul 7 meñ 369 megavattqa citte. Töbäklär buyınça qarağanda, berençelek İzmirdä. Anda uzğan yıl 1405 megavatt cil ênergiyäse alınğan.   

“Sabax” gazetı “FİFA futbol sammitı İstanbulda başlana” dip xäbär itä

FİFA äğ’zası 47 federaśiyäneñ citäkçese häm yuğarı däräcäle idaräçeläre sammitqa cıyıla. Ul bügen İstanbulda başlana. Älege sammit 2016nçı yıldan birle Törkiyädä ikençe tapqır uza.