Törek matbuğatına küzätü 15.05.2018

Yaña Şägaq gazetı “İlbaşı Räcäp Tayyip Ärdoğan: İzrail’ terrorçı däwlät” iseme astında yazma urtaqlaşqan. Anda Ärdoğannıñ Gazzädäge waqıyğalarğa qarata mönäsäbäte açıqlana. Ul İzrail’ köçläreneñ, AQŞ ilçelegen Qudüskä küçerügä rizasızlıq belderüçe fälästinlelärgä ut açıp, distälärçä keşene şähit itüenä reakśiyasın kürsätte. “İzrailneñ ğamälläre genośid. İzrail – terrorçı däwlät”,-dide.

Ärdoğan Angliyada törek studentları belän oçraştı. Üz çığışında ul Törkiyäneñ Fälästingä teläktäşlek mäs’äläsendä qararlı buluın belderde. “Bügenneñ, İslam dön’yası bularaq, Qudüsne yuğaltqan kön buluına berqayçan da yul quymayaçaqbız”,-dip söyläde Räcäp Tayyip Ärdoğan.    

Xäbär Türk gazetındağı könüzäk mäqalä Bäkir Bozdağnıñ süzläre belän  “Qudüs bäysez Fälästinneñ başqalası” dip isemlängän.

Törkiyä xökümäte räise urınbasarı häm süzçese Bäkir Bozdağ basıp aluçı İzrail’ ğaskärläreneñ tınıç demonstraśiyägä çıqqan unnarça qoralsız fälästinlene üterüen kisken tänqıyt’läde. Ul kiçäge waqıyğalarnıñ tarixqa qanlı düşämbe bularaq kerep qalaçağın belderde. Anıñ fikerençä, İslam däwlätläre bu xaqsızlıq qarşında bergäläp xäräkät itärgä tiyeş.  

Watan gazetı “Amerika Quşma ştatlarınıñ aradaşçılığı monnan soñ bette” dip isemlängän yazma urnaştırğan. Anda tışqı êşlär ministrı Mäwlet Çavuşoğlu Qudüstäge qanlı waqıyğalarda provokator bularaq çığış yasağan AQŞnıñ, bik teläsä dä, monnan soñ İzrail’ – Fälästin mäs’äläsen çişüdä aradaşçı bula almayacağın belderä. AQŞ ilçelegeneñ Qudüskä küçenüe xaqında ul şundıy süzlär äytte: “Ber yaqta - muzıka uynıy, açılu tantanası, ikençe yaqta – ütereş. İkese dä ber ük cirdä, ber ük waqıtta”.   

Sabah gazetı “İstanbulda Qudüs protestı” isemle yazma täq’dim itä.

İstanbulnıñ Bäyoğlu rayonında tuplanğan meñnärçä keşe AQŞ ilçelegen Qudüskä küçerügä rizasızlıq belderde. Amerika bu adımnı näq’ menä fälästinlelär öçen “Böyek Hälakät” bulğan Nakbanıñ 70 yıllığında yasadı.

İstanbullılar başta Tunnel’ mäydanında cıyıldı. Törkem “Qudüs möselmannarnıqı” dip yazılğan bannerlar kütärep Galatasaray mäydanına taba quzğaldı. Yış qına AQŞ häm İzrail’gä qarata şiğar’lär qıçqırdılar. İctimağıy oyışmalar rizasızlıq çaraların Ramazan ayı buyınça däwam itü qararı birde.  

Star gazetı “18 trillion dollar belän idarä itüçe bank, fond häm şirkätlärne Törkiyägä investiśiyä yasarğa çaqırdılar” dip yaza.

İlbaşı Räcäp Tayyip Ärdoğan Londonda dön’yaküläm bazarğa yünäleş birüçe, 18 trillion dollarnı äyläneştä yörtüçe investorlar belän oçraştı. Anda 25 firma häm fondnıñ wäkile bulğan yuğarı däräcädäge menedjerlar qatnaştı. Ärdoğan üz çığışında Törkiyädä 3 meñnän artıq ingliz şirkäteneñ êşläwen häm çit il investorları öçen ähämiyätle taşlamalar kertelüen belderde. Ul tağın da qulay şartlar öçen programma xäzerlänüenä dä basım yasadı. İlbaşı çirle häm çit il investorları arasında bernindi ayırma quymawların assızıqladı.