Törek matbuğatına küzätü 03.05.2018

“Yaña Şäfaq” gazetında “Törkiyä Tön’yaq häm Kön’yaq Koreyanıñ yaqınayuınnan qanäğat’” isemle yazma urın alğan. Anda ilbaşı Räcäp Tayyip Ärdoğannıñ tarixi oçraşu xaqında fikerläre birelä. Ul Tön’yaq häm Kön’yaq Koreya liderlarınıñ küreşüen “dön’yadağı qurqularnı häm borçularnı yuq itüçe” bularaq bäyäläde. Ärdoğan Kön’yaq Koreyağa säfäre waqıtında da kürşe däwlätneñ adımnarına uñay qaraşın belderde. “Tön’yaq Koreya törle illär belän oçraşuların däwam itsä bik yaxşı bulır. Törkiyä bu nisbättän qulınnan kilgänne êşlärgä äzer,”-dide ilbaşı.

“Watan” gazetındağı “Törkiyäneñ dälilläre könbatış däwlätlären çigenergä mäcbür itte” isemle yazma Süriyädäge terrorçılarğa qoral birü temasın kütärä. Yaña mäğ’lümatlarğa kürä, AQŞ häm başqa illär, yabıq işeklär artında uzuçı cıyılışlarda urtaqlaşqan mäğ’lümatlardan soñ, PYDne êlekkege şikelle ük yaqlamıy. Xäzer açıqtan-açıq “PYD/PKK terrorçı oyışma tügel” dip beldermilär.   

“Xäbär Türk” gazetı “Êstoniyadan Törkiyägä turist ağımı” xaqında yaza. Soñğı waqıtlarda älege tön’yaq Awrupa dälätennän İstanbulğa kilüçelär kübäyde. Alarnı, bigräk tä, tarixi urınnar qızıqsındıra. Monıñ säbäbe – böten dön’yada rekord külämdä qaraluçı törek serialları. Êstoniyalılar Söläymaniyä mäçete, Topkapı sarayı, Xürräm Soltan häm qanuni Soltan Söläymannıñ törbälären kürergä kilä.  

“Star” gazetı “5 qıytğada 15 il belän säwdä däräcäse kütäreläçäk” dip belderä. Törkiyäneñ bazarğa kerü komitetı 2018-2019nçı yıllarda iq’tisad tarmağında maqsat itep quyılğan illärneñ isemlegen tözede. Törek êksportçıları öçen bu ähämiyätle mäğ’lümat. Alar qaysı bazarda êşçänlek alıp barırğa ikänen aldan belep tora. Komitet isemlegendä êksport öçen uñışlı illär dip Germaniya, AQŞ, Qıtay, Êfiopiya, Kön’yaq Koreya, Hindstan, Ğıyraq, İran, Yaponiya, Katar, Keniya, Ukraina, Meksika, Rumıniya häm Rusiyä bilgelängän.

“Sabah” gazetı “Dön’yada törek telenä qızıqsınu” yazmasın urnaştırğan. Anda Yunıs Ämrä institutı başlap cibärgän törek tele häm mädäniyäte kurslarına yörergä teläwçelär dön’yanıñ 59 ilendä 65 meñnän artqan diyelä. Bu rekordlı san. Xökümätläre Törkiyägä qarşı propaganda alıp baruçı Misır, İzrail’ häm Ärmänstanda isä törekçä öyränergä teläwçelär kurslarğa tönlä terkälgän. AQŞ, Angliya, Hindstan, Kuba şikelle illärdän dä Törkiyägä kilergä teläwçelär küp.  Yunıs Ämrä institutı 2018nçe yılda cäyge kurslarğa 1 meñ 71 uquçı qabul itäçäk.