Törek matbuğatına küzätü 05.04.2018

“Yäni Şafak” gazetı: “Urtaq qararğa kilende, Süriyäneñ cir bötenlegendä urtaq fiker”

İlbaşı Räcäp Tayyip Ärdoğan räislegendä başqala Änkarada uzdırılğan Törkiyä-Rusiyä-İran öç yaqlı sammitı tämamlandı. Ärdoğan, Putin häm Ruhani urtaq belderü yasadı. İlbaşı Ärdoğan töbäktä böten terror oyışmalarına ber ük totışta xäräkät itelüeneñ zarurlığına basım yasağan bulsa, İran İlbaşı Hasan Ruhani: "Yaralarnıñ beterelüe mäs’äläsendä kileştek”, - dip äytte. Rusiyä Däwlät başlığı Vladimir Putin isä: "Süriyäneñ cir bötenlegendä öç il ber ük fikerdä”, - dip belderde.

“Xäbär Türk” gazetı: “Putin Ärdoğannıñ Süriyä öçen yaña täq’dimen açıqladı”

İlbaşı Räcäp Tayyip Ärdoğan, Rusiyä Däwlät başlığı Vladimir Putin häm İran İlbaşı Hasan Ruhani qatnaşqan öç yaqlı Süriyä sammitınnan soñ urtaq matbuğat oçraşuı ütkärelde. Putin cıyılış waqıtında İlbaşı Ärdoğannıñ Süriyä külämendä mediśina yärdämenä ixtıyacı buluçılarğa aşığıç yärdämneñ citkerelüe öçen êşçänlek başqarıluın täq’dim itüen häm bu mäs’älädä kileşügä ireşülären açıqladı.

“Yäni Şafak” gazetı: “Süriyä sammitı yomğaq beldergese täq’dir itelde”

İlbaşı Räcäp Tayyip Ärdoğan, Rusiyä Däwlät başlığı Vladimir Putin häm İran İlbaşı Hasan Ruhanineñ Änkarada uzdırğan Süriyä temalı yuğarı däräcäle oçraşuınnan soñ urtaq belderü iğ’lan itelde. Süriyä temalı liderlar sammitında Törkiyä, Rusiyä häm İrannıñ Süriyäneñ cir bötenlegeneñ saqlanuı öçen "terrorçılıq belän köräş kiyeme astında mäydanda yaña çınbarlıqlarnıñ tudırıluı”na qağılışlı härtörle kereşüne kire qağuına basım yasaldı. 3 lidernıñ urtaq bäyannamäsendä Ruhanineñ çaqıruı uñayınnan monnan soñğı cıyılışlarnıñ İranda ütkäreläçäge dä citkerelde.

“Sabah” gazetı: “Awrupa Berlege wäkillege Törkiyägä kiläçäk”

Törkiyäneñ Awrupa Berlege ministrı häm baş söyläşüçe Ömär Çälik viza irege mäs’äläse belän bäyle bularaq Awrupa Berlege wäkillegeneñ şuşı ayda Törkiyägä kiläçägen äytte. Çelik Törkiyä Böyek Millät Mäcleseneñ Tışqı êşlär komissiyasında yasağan çığışında, viza irege mäs’äläsen Awrupa Berlege komissiyası başlığınıñ berençe urınbasarı Frans Timmermans belän söyläşüen belderep: "Alar bez birgän viza iregenä qağılışlı yazu belän bäyle texnik wäkillekne bu ay êçendä Törkiyägä cibäräçäklär, üz qaraşların bezgä citkeräçäklär”, - dip äytte.

“Star” gazetı: “Törkiyä birgän mäğ’lümatlär yärdämendä ike terror höcümen totqarladıq”

Rusiyäneñ FSB Federal’ iminlek xezmäte direktorı Aleksandr Bortnikov 7nçe Mäskäw Xalıqara iminlek konferenśiyasında yasağan çığışında Törkiyä häm Amerika Quşma Ştatları birgän mäğ’lümatlär näticäsendä ildä yaña yıl qotlawları waqıtında ike terror höcümen totqarlawların belderde.