Törek matbuğatına küzätü 26.03.2018

 “Sabah” gazetı “Hilal kürengän cirdä ömet bar” isemle yazmasında Süriyäneñ Afrin töbägen terror oyışmalarınnan arındırğannan soñ Törkiyäneñ tınıç xalıqnıñ ixtıyacların qanäğät’länderü häm tormışnı cayğa salu öçen êşkä kereşüe turında yaza.

“Qızılay” yärdäm oyışması qaynar rizıq tarata başladı.”Qızılay” oyışması başlığı Käräm Kınık ”Hilal, ay-yoldız kürengän cirdä ömet bar, keşelär ışana häm sıyına ala torğan urın bar. Keşelärneñ qayğı-xäsräte betkänçe êşçänleklärebezne däwam itteräçäkbez”dide.  

”Yäni Şafak” gazetı” Milli hawa raketaları 2020 nçe yılda äzer” isemle xäbärendä İstanbulda 13 nçe xalıqara saqlanu sänäğäte yärminkäsendä urın alğan cirle “Gökdoğan” häm  “Bozdoğan” raketaları belän bäyle êşçänleklärneñ däwam itüen citkerä.

Xäbärdän kürengänçä, ike raketanıñ da cirdän ballistik täwge atışları başqarıldı. Sinoptağı sınap qarawlar uñışlı uzdı. Proyektnıñ 2020 nçe yılda tämamlanuı küzdä totıla.

 “Vatan” gazetı ”Täwge tapqır Törkiyädä tormışqa aşırıldı” isemle yazmasında Änkara universitetınıñ mediśina fakul’tetında Da Vinci robotı belän baş söyäge şeşe operaśiyäse başqarıluın häm monıñ dönyada täwge tapqır yasaluın uquçıları belän urtaqlaşa. 

”Xörriyät” gazetı” Törkiyägä küçenäm” isemle xäbärendä yawlıqlı model’ Halima Adennıñ model’yer Raşit Bağzıbağlınıñ moda tamaşasında qatnaşu öçen Törkiyägä kilüen häm Törkiyäne maqtap telgä aluın, instagramnan İstanbul räseme urtaqlaşıp, “Törkiyägä küçenäm” dip yazuın citkerä.

“Xäbär Törek” gazetı “Êverton” futbolçısı Cänk Tosunnı maqtadı” isemle xäbärendä Törkiyäneñ “Bäşiktaş” komandasınnan Angliyäneñ “Êverton” taqımına kitkän Cänk Tosunnıñ soñğı 3 matçta 4 gol kertep iğtibarnı cälep itüe, êlek “Êverton”da uynağan Dunkan Fergusonnıñ Cänkkä bäyä birep, “Ägär bu raweşle däwam itsä zur uñışlarğa ireşer. Küp gollar kerter dip ışanam”dip äytüen belderä.