Törek matbuğatına küzätü 03.11.2017

“Xäbär türk” gazetı “Cirle avtomobil’ne citeşteräçäk şirkätlär bilgele” isemle xäbärendä cirle avtomobil’ öçen berençe adımnıñ yasaluın yaza.

Xäbärgä kürä Törkiyä ilbaşı Ärdoğan cirle avtomobil’ êşläp çığaraçaq şirkätlärne açıqladı. İlbaşı kölliyätendä Törkiyäneñ avtomobil’ urtaq kereşü törkemen tanıtu cıyılışında çığış yasağan ilbaşı bu şirkätlärneñ Anadolu Grubu, BMC, Kıraça Holding, Turkcelle häm Zorlu Holding buluın äytte.

“Yäni Şafak” gazetı “5 milliard dolarlık 22 proyekt” isemle yazmasında Saqlanu sänägäte başqarma komitetınıñ premyer-ministr Binali Yıldırım räislegendä Änkarada cıyıluın citkerä.

Gazet yazuınça saqlanu sänägäte kinäşçelegennän yasalğan açıqlawğa kürä cıyılışta 5 milliard dolarlık 22 proyekt qaraldı. Komitet tarafınnan milli ozın radiuslı hawa häm raketa saqlanu sistemalarınıñ yasaluına qarağan proyektlar, törle üzençälektäge raketa häm smart texnologiya proyektları, êlektr xärbi sistema proyektları, törle kalibr häm ülçämdäge bomba oçırtuçı, mıltıq häm pistolet yasaw häm seriyale citeşterü proyektları belän bäyle qararlar qabul itelde.

“Star” gazetı “Türksat 6A öçen kön bilgelände” isemle xäbärendä Törkiyäneñ berençe cirle häm milli êlemtä iyärçene Türksat 6Anı citeşterüneñ 2020nçe yılnıñ dekabr’ ayında tämamlanacağın äytüen yaza.

Xäbärdän kürengänçä Törkiyädäge Ğil’mi häm texnologik tikşerenü oyışması TÜBİTAKnıñ Cämäğat’çelek tikşerenüläre yärdäm törkeme koordinatorı Mostafa Ay iyärçenneñ citeşterelgännän soñ ğalämgä oçırtıluınıñ planlanuın belderde.

“Xörriyät” gazetı “Sabancı dönyanıñ iñ köçle 100 xatın-qızı isemlegendä” isemle yazmasında dönyanıñ aldınğı êş dönyası jurnallarınnan “Forbes”nıñ “Dönyanıñ iñ köçle 100 xatın-qızı isemlege”n açıqlawın uquçıları belän urtaqlaşa.

Gazet yazuınça Törkiyädän isemlektä urın aluçı berdänber isemneñ Sabancı Holding idarä şurası başlığı Gülär Sabancı buldı. Sabancı isemlektä 12 urınğa kütärelep, 58nçe urınğa kilde. Jurnal Gülär Sabancını tanıtqan yazmağa da urın birgän.