Törek matbuğatına küzätü 11.09.2017

“Xörriyät” gazetı “İslam dönyasına bergälek çaqıruı” isemle yazmasında Törkiyä ilbaşı Räcäp Tayyip Ärdoğannıň İslam illäreneň tarqalu häm kiyerenkelekkä tügel, bergälekkä moxtac buluın belderep ,“M’yanmada möselmannnarğa qarata cäber – zolımnı ,sörgennärne tuqtatu öçen barıbız bergä tırışırğa tiyeşbez” dip äytüen citkerä.

Xäbärdän kürengänçä, İslam xezmättäşlek oyışmasınıň 1 nçe fän-belem häm texnologiya sammitı kiçä Qazaqstan başqalası Astanada uzdı. Yuğarı däräcäle oçraşuda Törkiyäne ilbaşı Räcäp Tayyip Ärdoğan wäkillek itte.

 “Star” gazetı  “Yıldırım 10 yılda 300 milliard dollar kapital salınaçağın belderde” isemle xäbärendä  Törkiyä prem’yer-ministrınıň İskeşähärdä êş dönyası häm ictimaği oyışmalar oçraşuında qatnaşuı turında yaza.

Gazet yazuınça, Binali Yıldırım kiläse 10 yılda törle tarmaqlarda 300 milliard dollar külämendä kapital salınaçağın, Törkiyäne global investorlar cähätennän populyar üzäkkä äwerelderü öçen bar köçlärenä tırışuların citkerde.

”Sabah” gazetı “Barı tik Törkiyä yärdämgä aşıqtı” isemle xäbärendä arakanlı möselmannarnıň problemalarına dönya iğ’tibarsız qalğanda Törkiyä wäkillegeneň Bangladeştağı lager’larğa barıp arakanlı möselmannarnıň qayğısın urtaqlaşuın belderä.

 Xäbärdän kürengänçä, 2012 nçe yıldan başlap bügenge köngä qadär arakanlı möselmannar draması belän qızıqsınğan häm uzğan atnada töbäkkä 1000 tonna yärdäm taratuğa kereşkän Törek xezmättäşlek häm koordinaŝiya agentlığı TİKA başlığı Särdar Çam “Berläşkän Millätlär Oyışması äkrenläp yuqqa çığa bara. Arakanda barı tik Törkiyä genä bar ide” dide.

”Vatan” gazetı “Ŝipras Törkiyägä işeklärne yabunıň yalğış buluın belderde” isemle yazmasında Greŝiya prem’yer – ministrı Aleksis Ŝiprasnıň Törkiyä häm Awrupa Berlege arasındağı söyläşülärne tuqtatunıň yalğış bulaçağı turında äytüen citkerä.

 Ŝipras 82 nçe Xalıqara Saloniki yärminkäse qısasında tradiŝion matbuğat oçraşuı ütkärde. Ŝipras Törkiyäneň möhim regional’ köç buluın häm töbäkneň iminlege, totrıqlılığı cähätennän ähämiyätle rol’ uynawın assızıqladı.

 “Xäbär Türk” gazetı “Bäyräm yalında 30 million keşe säyäxät itte” isemle yazmasında Qorban bäyrämendäge 10 könlek yalda 30 million keşeneň säyäxät itüen uquçıları belän urtaqlaşa.

Bu könnärdä avtoyullar häm küperlärne qullanuçı keşe sanı 15 million 500 meň täşkil itte. Hawa mäydannarında 7 million 156 meň 31 yulçığa xezmät kürsätelde. 1 million 830 meň keşe säyäxät öçen poyezdlarnı sayladı.