Törek matbuğatına küzätü 31.10.2016

 “Yäni Şafak” gazetı “Ênergiyädä yaña yünäleş Afrika” isemle yazmasında global’ köndäşlek artu belän xalıqara ênergiya şirkätläreneñ yaña bazar êzlänülären tizlätüe ênergiya investorlarınıñ yünäleşen Afrika qitğasına yünältüe turında yaza.

Gazet yazuınça, qitğa belän qızıqsınuçı törek investorlar häm afrikalı äydäp baruçılar tışqı iqtisadi mönäsäbätlär oyışması tarafınnan 2-3 noyabr’ könnärendä İstanbulda uzaçaq Törkiyä –Afrika iqtisadi häm êş forumında oçraşaçaq.

Törkiyä ilbaşı Räcäp Tayyip Ärdoğan ximayäsendä töbäktäge kapital salu mömkinlekläre, qitğadağu rezervlar qaralaçaq çarada Afrika illärennän ministrlar ,şäxsi oyışmalar citäkçeläre ,firma wäkilläre ,Afrika Ligası häm Afrika qalqınu bankı yuğarı däräcäle räsmi zatları häm Afrika regional’ iqtisadi cämğiyätläre ğomum särqätipläre qatnaşaçaq.

”Star” gazetı “Törkiyäneñ slaneś nefte Êstoniya radarında” isemle xäbärendä Êstoniya şirkäte “Êesti ênergiyä”neñ yuğarı däräcäle citäkçese Hando Sutterneñ şirkäteneñ dönyada slaneś nefte qullanıp ênergiya citeşterüçe iñ zur şirkät buluın belderep “Törkiyädäge 1 milliard 64 million tonna rezervnı qullanu ,investorlar tabu mäs’älälärendä törek investorları belän bergä êşli alırbız”dip belderüen citkerä.

Törkiyäneñ slaneś nefte rezervları iñ küp  Bolunıñ Göynük,Çorumnıñ  Dodurga,Amasyanıñ Merzifon,Yozgatnıñ Sorgun häm Kütahyanıñ Tunçbiläk häm Säyitömär ilçälärendä urnaşqan. 

”Xäbär Türk” gazetı “104 yıldan soñ azan tawışı işeteläçäk” isemle xäbärendä Makedoniyanıñ könyaq- könbatışında urnaşqan häm Ğosmanlı däwerendä üzäk wäzğiyätendä bulğan Monastır’ şähärendäge Xäydär Kadı mäçeteneñ  êlekke xälenä qaytarıluı turında yaza.

Xäbärdän kürengänçä,1561-1562 nçe yıllarda Kanuni Soltan Söläyman däwerendä salınğan Makedoniyanıñ Monastır’ qalasındağı Xäydär Kadı mäçetendä 2015 nçe yıldan birle alıp barılğan restavraśiya êşçänlekläre tögällände. 4 nçe noyabr’dä comğa namazında mäçettä yänä azan tawışları yañğırayaçaq.

”Xörriyät” gazetı “ Äfäs törek arxeologlarına ämanät” isemle xäbärendä Avstriyanıñ Törkiyägä qarata tiskäre diplomatik mönäsäbätläre belän bäyle ğamäldän çığarılğan arxeologik qazılmalar xaqında möhim belderülär yasağan mädäniyat häm turizm ministrı Nabi Avcınıñ Avstriyadan diplomatik bularaq mäs’älä belän bäyle uñay adım yasalmawın, tışqı êşlär ministrlığı belän söyläşep bu xaqta qarar qabul itäçäklären äytüen citkerä.

”Sabah” gazetı “TİKA moxtaclarğa yärdäm qulı suzdı” isemle yazmasında Törek xezmättäşlek häm koordinaśiya agentlığı TİKAnıñ dönyanıñ törle poçmaqlarına şifa taratuın uquçıları belän urtaqlaşa.

 Xäbärdän kürengänçä, TİKA  yözlärçä ildä yuğarı texnologiya belän cihazlandırılğan xastaxanälär açtı. Törek xezmättäşlek häm koordinaśiya agentlığı 2016 nçı yılda 50 dän kübräk ildä 196 mediśina proyektın tormışqa aşırdı.

 Bolardan qayberläre tübändägelär: Bişkäktä qırğz-törek duslıq xastaxanäse, Üzbäkstanda Taşkent söyäk cilege küçerü üzäge, Nigeriyädä äni-bäbi reabilitaśiya üzäge, Ğazzädä törek duslıq xastaxänäse, Somalida Törkiyä tikşerenü xastaxänäse, Mogadişoda Räcäp Tayyip Ärdoğan  isemendäge tikşerenü xastaxanäse häm Sudanda Nyala Törkiyä tikşerenü xastaxanäse.