Törek matbuğatına küzätü 20.10.2016

“Xörriyät” gazetı “Törkiyä reaktiv oçqıçları “PYD-YPG” maqsatların bombaladı” isemle xäbärendä Törkiyä reaktiv oçqıçlarınıñ Süriyäneñ Haläp (Xäleb) qalasınıñ tön’yağında “PKK” terror oyışmasınıñ töbäktäge däwamı “PYD/YPG”gä bäyle maqsatlarğa höcüm itüen belderä. Gazet yazuınça, Törek qorallı köçläre hawa xäräkätendä 160 belän 200 arasında “PYD/PKK” äğzaseneñ täêsirsez xälgä kiterelüen belderde. Çılbırlı texnika, ştab binası häm sıyınır cir belän bergä 18 maqsat yuqqa çığarıldı.

“Sabah” gazetı “Yaña iminlek manifestı” dip atalğan yazmasında Däwlät başlığı Räcäp Tayyip Ärdoğannıñ İlbaşı qolliyäsendä uzdırılğan 28nçe starostalar cıyılışında yasağan çığışında Törkiyäneñ yaña iminlek añlayışın açıqlawın yaza. Gazet belderüençä, İlbaşı Ärdoğan, Törkiyäneñ yalğış iminlek añlayışın taşlap, monnan arı problemalar aldan bilgelänep xäl iteläçägen äytte. Monnan arı pıçaq söyäkkä terälgänçegä çaqlı sabır itelä alınmayaçağın belderüçe İlbaşı Ärdoğan: "Üz plannarıbıznı başqarıp, yanawlarnı urınında yuqqa çığaraçaqbız. Terror probleması barmı? Bezgä höcüm itülären kötmäyäçäkbez. “PKK” separatist terror oyışmasın ildä häm ilneñ aryağında yuqqa çığaraçaqbız. Musul problemasın Musulda xäl itäçäkbez. Süriyädä Dabıktan äl Babğa barıp citäçäkbez”, - dip äytte.

“Watan” gazetı “Başikağa höcüm Änkarağa yasalğan bulıp isäpläner” isemle yazmasında Premyer-ministr urınbasarı Numan Kurtulmuşnıñ Törkiyäneñ Ğiraqtağı Musul qalası yanındağı Başika nığıtmasına höcüm bulğan oçraqta qulınnan kilgänne yasayaçağın belderep: “Başikağa höcüm bulğan oçraqta monıñ Änkarağa yasalğan höcümnän bernindi ayırması yuq. Anda tınıçsız itelüenä röxsät birmäyäçäkbez”, - dip äytüen citkerä. Gazet yazuınça, Musul belän ber rättän Kärküktäge êtnik üzgäreşne Törkiyäneñ qabul itüeneñ mömkin bulmawın belderüçe Kurtulmuş bu ike şähärneñ Törkiyäneñ qızıl sızıqları buluına basım yasadı.

“Yäni Şafak” gazetı “Şveśiyadan tulı ışanıç” dip atalğan yazmasında töbägendä geo-politik yanğın uzğan här kön arta barğan Törkiyäneñ yaña investorlarnı cälep itkäne kebek xäzergeläre dä bazardağı kapital saluın arttıruın yaza. Yazmada bolay diyelä: “Awrupa Berlegeneñ tawışsız däw häm salqın tön’yaq ile Şveśiyadan Törkiyä iqtisadına cılı yullamalar yasaldı. 400gä yaqın marka belän ilebezdä êşçänlek alıp baruçı Şveśiya şirkätläre “Business (Biznes) Sweden” Şveśiya säwdä häm kapital salu üzäge äzerlägän “Törkiyä êş şartları tikşerenüe” belän Törkiyä iqtisadına ışanıçnı yañarttı”.

“Xäbärtürk” gazetı “Bäşiktaş”-“Napoli” arasındağı matç turındağı yazmasında Çempionnar ligasındağı Törkiyä wäkile “Bäşiktaş” taqımınıñ Awrupada 18 matçnı hiç ottırmağan “Napoli” komandasın köndäş qırında 3-2 isäbe belän ciñüen xäbär itä häm matç turında täfsille mäğlümat birep uza.