Törek matbuğatına küzätü 08.09.2016

“Yäni Şafak” gazetı "Rakka xäräkätenä uñay qarıybız” dip atalğan yazmasında 15nçe iyül’ tüntäreleş kereşüennän soñ 4nçe tapqır İlbaşı qolliyäsendä cıyılğan Ministrlar Şurası cıyılışınnan soñ belderü yasawçı Nurättin Caniklineñ Amerika Quşma Ştatları belän Rakka operaśiyäsenä uñay qarawların äytüen citkerä. Gazet yazuınça, Canikli: "AQŞ İlbaşı Barak Obamanıñ teläge buldı. İlbaşıbız da moña uñay qarawın äytte. Mäs’älä belän bäyle texnik söyläşülär däwam itä”, - dip belderde.

“Sabah” gazetı "“PKK” belän “FETÖ”nıñ tüntäreleş ittifaqı" isemle yazmasında “Fätullahçı” (FETÖ/PDY) terror oyışması/parallel däwlät qorılışı belän “PKK” terror oyışması arasındağı organik bäyläneşne häm 15nçe iyül’ tüntäreleş planlaştırıluına qağılışlı ittifaqnı kürsätüçe bik möhim açıqlawnıñ bilgele buluın xäbär itä.

Yazmada bolay diyelä: “17nçe avgustta Van poliśiyası, “2nçe aprel’ poliśiya üzäge citäkçelege belän vilayät iminlek mödirlege kebek organnarğa bomba töyälgän maşina belän terror höcümen oyıştırğan häm yaralanğan kileş qulğa alınğan “PKK” terrorçısı xastaxanädä ütkärelgän soraw alu waqıtında yasağan açıqlawında: “15nçe iyül’ könne tüntäreleş bulaçağı bezgä belderelde, ğamällärne tuqtattıq. Kereşü uñışsız bulğaç, qabat ğamällärgä başladık", - dip äytte. İminlek häm küzläw berämlekläre 15nçe iyül’ tüntäreleş kereşüe waqıtında “PKK” terror oyışmasınıñ bilgele ber waqıt buyı terror ğamällären yasamawı häm monıñ taktikası tikşerelgän çaqta “PKK” terrorçısınıñ şuşı süzläreneñ çınbarlıqnı böten neçkälege belän kürsätüen belderde.”

“Habär Türk” gazetı "900 million törek lirası külämendä iminlek proyektı” isemle yazmasında “HAVELSAN” aviaśiya êlektronika sänäğäte ğomum mödire Hamdi Atalaynıñ 15nçe iyül’ tüntäreleş kereşüennän soñ ähämiyäte tağın da artqan “HAVELSAN”nıñ êçke häm tışqı yanawlarnı, terrorçılıq belän köräş operaśiyaların häm ilneñ kiläçägenä qağılışlı zur proyektlarnı açıqlawın yaza.

Gazet yazmasında äytelgänçä, “Törkiyä külämendäge şähär iminlek idaräse sisteması proyektınıñ böten tizlege belän däwam itüen añlatuçı Atalay 900 million liralıq proyekt qısalarında Törkiyäneñ här noqtasına iñ soñğı texnologiya kameralarınıñ urnaştırılaçağın äytte.

Kapıkulädän kergän beräw aqıllı sistemalar belän Hakkarigä qädär küzätelä alınaçağın, maşina nomerı, yöz-tanıqlıq tanu sistemasınıñ bulaçağın assızıqladı.

“Hürriyät” gazetı "Ğosmanlı portikları yañadan Qağbädä” isemle yazmasında Qağbäneñ tävaf mäydanın kiñäytü öçen 2012nçe yılda sütelgän zur öleşeneñ êlekkege urınnarınnan 20 metr arttaraq restavraśiyälänep urnaştırıluın xäbär itä.

Gazet yazuınça, Soğud Ğäräbstanı patşası Salman Bin Abdulazizneñ “Qağbäneñ muyınsası kebek bulğan” dip äytkän yabulı galereyalar (portiklar) belän bäyle êşçänlekneñ bötenese yıl azağında betäçäk. Miğmar Sinan tarafınnan salınğan häm 500 yıl buyı Qağbäne qısaları belän çolğap alğan yabulı galereyalar tözeleş betkännän soñ Qağbäneñ tiräsendä hilal räweşendä toraçaq.  5 yıl êlek başlatılğan tävaf mäydanı êşläre waqıtında Ğosmanlı yabulı galerayalarınıñ sütelüe reakśiyağa säbäp bulğan ide. Ul çaqtağı Premyer-ministr Räcäp Tayyip Ärdoğan Soğud Ğäräbstanı säfäre waqıtında Patşa Abdullah bin Abdülaziz Äl-Suud belän küreşep, portiklarnıñ yañadan urnaştırıluı süzen alğan häm şunnan soñ yabulı galereyanı restavraśiyäläw êşe Törkiyä şirkätenä birelgän ide.

“Vatan” gazetı "Qızılırmak del’tası qoş cännäte UNESKO tarafınnan Dönya mirası waqıtlı isemlegenä alındı” isemle yazmasında Samsun şähär xakimiyäte başlığı Yusuf Ziya Yılmaznıñ Törkiyäneñ möhim su mäydannarınnan berse bulğan Qızılırmak del’tası qoş cännäteneñ çärşämbe könne UNESKO tarafınnan Dönya mirası waqıtlı isemlegenä alınuın äytüen citkerä. Qızılırmak del’tası qoş cännätendä  478 qoş töreneñ bilgelänelüe mäğlümaten birüçe gazet Qızılırmak del’tasınıñ dönyadağı qoş cännätlärennän ayırmalı qıluçı iñ möhim üzençäleklärennän berseneñ yılnıñ här ayında törle qoşlarnıñ kürenä alınuı buluın assızıqlıy.