Törek matbuğatına küzätü 23.06.2016

“Sabah” gazetı “İkeyözle Awrupa” isemle xäbärendä Törkiyäneñ terrorçılıq belän köräş öçen här çarasına tawış çığaruçı könbatışnıñ mäs’älä Frantsiya bulğanda tınıp qaluın citkerä.

Xäbärgä kürä Parijda hönärçelär berlekläre oyıştıraçaq zur çaranı xökümät başta tıydı, soñınnan çikläde. Protest häm yöreş qanunın çiklägän bu waqiğanı könbatış, mediası frantsuz politsiyaseneñ monnan aldağı ğamällärenä bulğanı kebek yänä bitaraf qaldı.

Gazet yazuınça frantsuz xökümäteneñ çaralarnı tıyuına BBC berençe bitendä urın birmäde. “Guardian” gazetı internet säxifäsendä qısqa belderü belän waqiğanı atlatıp uzdı.

Xäbärdän kürengänçä üzäge AQŞta urnaşqan CNNda Parij belän bäyle turistik xäbärlär urın alunı däwam itterä.

“Star” gazetı “PYD fiaskosı” isemle xäbärendä AQŞ belän ber rättän Rusiyä Federatsiyase häm qayber NATO illärennän xärbi yärdäm kürgän PKK terror oyışmasınıñ Süriyädäge törkeme PYDneñ oyışma öçen legalläşü barışına kergän Rakka häm Menbiç operatsiyalärendä ciñelä başlawın yaza.

Xäbärgä kürä PYD proyektı xärbi häm demokratiya fiasko belän tögällänep, çişelü barışına kerde.

Gazet yazuınça Tönyaq Süriyädä PYD safında suğışuçı körtlär oyışmanıñ zolım häm ğazaplawlarına qarşı xäräkät itä başladı. Oyışmanıñ çın yözen kürgän kördlär törkemnär räweşendä Tönyaq Ğiraqtağı Barzani citäkçelegenä sıyına yäisä başqa töbäklärgä qaça başladı.

“Xäbär türk” gazetı “Ğazzägä törek proyektları” isemle xäbärendä Törkiyä belän İzrail arasında 26nçı iyun könne uzaçaq cayğa salu söyläşülärennän soñ Ğazzägä qarata elektr, su, asqorıma ixtıyacın qanäğatländeräçäk kritik proyektlarnıñ ğamälgä kertelüeneñ kön tärtibendä buluın citkerä.

Xäbärgä kürä Törkiyä kübräk cämiğlarnıñ qabat tözelüenä qarağan 11 proyekt belän Ğazzädä eşçänleklären alıp bara.

Gazet yazuınça İzrail Ğazzägä yärdäm alıp baruçı Mavi Marmara köymäsen xalıqara su kiñleklärendä qanlı höcüm belän tuqtatıp, 9 aktivistnı şähit itkän, soñınnan Törkiyädän ğafu ütenep, kompensatsiya tüläwne dä qabul itkän ide.

Xäbärdä Törkiyäneñ ayıruça İzrailğa Ğazzä embargosın ciñeläytüe şartın quyuı urın ala.

“Watan” gazetı “Bäyräm öçen taşlamalı satular başlana” isemle yazmasında taşlamalı bäyälärdän dä tübän bäyädän satıp alu mömkinlegen tudıruçı “Bäyrämgä äzerlek könnäre”neñ İstanbuldağı CNR EXPO Yäşilköydä başlanuın citkerä.

Xäbärgä kürä 16nçı iyul könenä qadär baraçaq çara awız açqannan soñ da däwam itäçäk. Satıp aluçılarnıñ bar äyberlären ber urında aluları maqsatı belän oyıştırılğan yärminkädä kiyem-salımnan alıp kosmetikağa, suvenir äyberlärdän alıp täm-tomğa qadär härtörle sıyfatlı produktsiya satılaçaq.

Gazet yazuınça 200dän artıq şirkät qatnaşaçaq çarağa 1 millionnan artıq keşeneñ kilüe kötelä.