Törek matbuğatına küzätü 26.08.2014

“Radikal” gazetınıñ internet säxifäsendä urın alğan “Abdullah Gülneñ sawbullaşu yullaması” isemle xäbärendä tübändägelär citkerelä.

Wazifa başqaru waqıtı 28 nçe avgustta tögällänäçäk Törkiyä ilbaşı Abdullah Gül xalıqqa möräcäğät itep sawbullaşu yullaması yasadı.

Gül üz yullamasında bolay dide:” Milli iradäneñ wäkile, Törkiyä Böyek Millät Mäclese tarafınnan saylanğan ilbaşı wazifamda berençe çiratta xalqıbızğa Çankayanıñ işeklären açtım. Däwlät belän millätne berläşterdem, duslaştırdım. Töp Qanunnı ütäw häm däwlät oyışmaları arasında garmoniya tä’min itü wazifasın iñ yaxşı räweştä tormışqa aşırırğa tırıştım”.

“Star”gazetı “Marmaray 10 ayda 34 million yulçı taşıdı” isemle xäbärendä İstanbulda uzğan yılnın 29 nçı oktyabrendä açılğan su astınnan da uzuçı Marmaray timer yulınıñ 10 ayda 34 million yulçığa xezmät kürsätüe turında yaza.

Gazet beldergänçä, köndä urtaça 102 meñ keşe taşığan Marmaray 29 nçı oktyabrdän birle 34 million yulçını diñgez astınnan qitğalar arası säyäxät itterde.

“Xörriyät” gazetı “Tulı wäqalätle ilçe küzlegennän Törkiyä” isemle xäbärendä 2012 nçe yıldan birle Törkiyädä Slovakiya tulı wäqalätle ilçese bularaq wazifa başqaruçı Milan Zacharnıñ xezmät çorında Törkiyä buylap gizüen häm 50 meñ tiräse räsem töşerüen , xäzer isä bu fotoräsemnärne başqalar belän urtaqlaşu öçen kitap yazarğa äzerlänüen citkerä.

“Yäni Şafak” gazetı “PKK 3 qıtay injenerın urladı” isemle xäbärendä “PKK” terror oyışmasınıñ Törkiyädä Şırnaknıñ Silopi ilçäsendäge termik üzäk stantsiyädä eşläwçe 3 qıtay eşçene urlawın xäbär itä.

Xäbärdän kürengänçä, urlanğan eşçelärne qotqaru öçen kiñ qırlı operatsiya başlatıldı. Terrorçılar termik stantsiyägä qorallar belän höcüm itä , waqiğada 1 iminlek xezmätkäre dä ciñelçä yaralana.