Törek matbuğatına küzätü 21.08.2014

“Milliyät” gazetı “AQŞta törek jurnalistı qıynaldı” isemle xäbärendä Törkiyäneñ Tışqı eşlär ministrlığı süzçese Tanju Bilgiçneñ Anadolu agentlığı xäbärçeseneñ AQŞnıñ Ferguson şähärendä politsiya tarafınnan qıynaluın häm qulğa alınuın äytüen citkerä.

Gazet süzçe Bilgiçneñ: “Anadolu agentlığı xäbärçese AQŞta kürgän möğamälä qabul itelä alınmıy. Amerika mäqamnärennän sizger totış kürsätülären sorıybız,” – digän süzlären uquçıları belän urtaqlaşa.

“Star” gazetı “Törkiyägä turıdan investitsiya arttı” isemle xäbärendä İqtisad ministrı Nihat Zeybekçineñ Törkiyäneñ investorlar öçen imin urın häm üzenä cälep itüçe il bulırğa däwam itüen belderep, berençe yartıyıllıqta çınğa aşqan 6 milliard 763 million dollar külämendäge xalıqara turıdan investitsiya miqdarınıñ monıñ iñ güzäl dälile buluın açıqlawın yaza.

“Yäni Şafak” gazetı “17 könlek awır säfär tämam” isemle xäbärendä Ğiraq Dimäşk İslam däwläte oyışması höcümnäre arqasında öylären taşlap kitkän yäzidilärdän 600eneñ 17 kön däwam itkän awır säyäxättän soñ Uludäräneñ Ortasu awılı yanınnan Törkiyägä kerüen belderä.

Yäzidilärneñ cäyäw kilüen öyrängän Ortasu awıl xalqı traktor häm pikaplarda çikne uzıp, Ğiraq cirlärendä maşinalarına utırtqan törkemne awılğa kiterülären citkerüçe gazet Ortasu başlanğıç mäktäbendäge sıynıflarğa urnaştırılğan yäzidilär öçen mäktäp baqçasında çaqtır qorğan awıldaşlarınıñ qunaqlarına aş-su täqdim itüen, xastalarğa darular birüen xäbär itä.

“Sabah” gazetı “Atatörek yaxtası “Savarona” äzer” isemle xäbärendä Törkiyä Cömhüriyäteneñ qoruçısı Mostafa Kämal Atatörek soñğı könnären uzdırğan 83 yıllıq “Savarona”nıñ 10 ay däwam itkän restavratsiya häm tözekländerüdän soñ yuğarı däräcäle däwlät şäxesläreneñ tarixi cıyılışlarında häm ähämiyätle qabul itülärdä qullanıluı öçen soñğı etap bulğan “Täcribä säfäre”nnän qaytuın yaza.

Gazet ğinwar ayınnan bügenge köngä qadär İstanbuldağı Kuruçäşmä portında bulğan Atatörek yadqäreneñ däwlät şäxesläreneñ Törkiyädä häm çit illärdäge cıyılışlarında qullanılır öçen äzerlänüen belderä.