Törek matbuğatına küzätü 12.08.2014

“Akşam” gazetı “Bergä eşläw öçen sabırsızlanam” dip atalğan yazmasında Törkiyä Cömhüriyäteneñ 12nçe İlbaşı bulıp saylanğan Premyer-ministr Räcäp Tayyip Ärdoğanğa däwlät häm xökümät başlıqlarınnan täbrik yullamalarınıñ kilüen xäbär itä. Gazet Amerika Quşma Ştatları İlbaşı Barak Obamanıñ: “Ärdoğan belän bu yaña wazıyfasında eşläwne sabırsızlıq belän kötäm”, - dip äytüen citkerä.

“Milliyät” gazetı “Awrupa Berlege: xezmättäşlekne arttıru öçen sabırsızlanabız” isemle yazmasında Awrupa Berlege Şurası başlığı Herman Van Rompuy belän Awrupa Berlege Komissiyäse başlığı Jose Manuel Barrosonıñ, 10nçı avgust saylawında İlbaşı bulıp saylağan Premyer-ministr Räcäp Tayyip Ärdoğannı qotlap, xezmättäşlekne arttıru teläklären citkerüen belderä. Gazet yasalğan urtaq yazma belderüdä Törkiyäneñ “Söyläşülär barışında bulğan namzät il, kürşe, möhim säwdä urtağı, tışqı säyäsät berlektäşe bularaq Awrupa Berlege cähätennän töp ähämiyätkä iyä ber partnyor” bularaq bäyälänüen häm “Böten şuşı ölkälärdä xezmättäşlegebezne arttıru öçen sabırsızlanabız”, - dip äytelüen assızıqlıy.

“Sabah” gazetı “Dönya matbuğatı: rekordsmen tağın ber uñışqa ireşte” isemle yazmasında Premyer-ministr Räcäp Tayyip Ärdoğannıñ saylaw ciñüeneñ dönya matbuğatında kiñ yañğıraş tabuın yaza. Gazet dönya matbuğatınıñ Ärdoğannıñ ciñüen “Törek säyäsäteneñ rekordsmenı qabat uñışqa ireşte”, “Tiñe kürenmägän ber köç” kebek süzlär belän citkerüen assızıqlıy.

“Vatan” gazetı “Yaña Premyer-ministr 27nçe avgustta” dip atalğan yazmasında Premyer-ministr Räcäp Tayyip Ärdoğan räislegendä cıyılğan “Aq” partiyäneñ Üzäk qarar häm başqarma şurasında ike möhim qararnıñ qabul itelüen xäbär itä.

Gazet “Aq” partiya Kongressınıñ 27nçe avgustta yaña ğomum başlığın saylaw öçen cıyılaçağın belderä. Kongress waqıtınıñ bertawıştan bilgelänelüen assızıqlawçı gazet Kongressta saylanaçaq ğomum başlıqnıñ Premyer-ministr bulaçağın yaza.

“Star” gazetınıñ iqtisad säxifäsendä çıqqan “Totrıqlılıq däwam itsen, yaña maqsatlarğa taba barıyq” dip atalğan yazmasında Premyer-ministr Räcäp Tayyip Ärdoğannıñ İlbaşı bulıp saylanuınıñ eş dönyasında da zur yañğıraş tabuına iğtibar yünältelä. Yazmada yaña İlbaşı belän totrıqlılıqnıñ däwam itäçäge qaraşında berläşkän eş dönyasınıñ Törkiyäneñ yaña kergän yuldan Awrupa Berlege häm 2023 kebek maqsatlarğa taba tağın da tizräk baraçağın belderüen citkerä.

“Hürriyät” gazetı “İzmitle yaña “i20” podiumğa çıqtı” isemle yazmasında “Hyundai Assan”nıñ İzmitta urnaşqan eşxanäsendä Awrupa öçen barı tik Törkiyädä eşläp çığarılaçaq ikençe buın “i20”neñ citeşterügä äzer torışı belän xasil buluın assızıqlıy. Yazmada yaña “i20”neñ matbuğat wäkillärenä täqdir itelüe turında äytelä. Gazet yaña buın “i20”neñ dönyadağı tanıtıluınıñ isä Parij avtomobil yärminkäsendä ütkäreläçägen belderä.