Törek matbuğatına küzätü 06.08.2014

“Vatan” gazetı “Suğış cinayäte möräcäğäte” isemle yazmasında Ğazzädä mäktäplärgä höcüm itelüe häm tınıç xalıqnıñ maqsat itelüe arqasında Fälästin Tışqı eşlär ministrlığınıñ, Xalıqara cäza mäxkämäsenä möräcäğät itep, İzrailneñ xökemgä tartıluın teläwen yaza.

“Yäni Şafak” gazetı “Yaralarnı beterä başladıq” dip atalğan yazmasında Törkiyä Tışqı eşlär ministrı Äxmät Dawıtoğlunıñ, utnı tuqtatudan soñ Ğazzädä yaralarnıñ beterelüeneñ aşığıç buluına basım yasap: “Mäydandağı törkemnärebez Ğazzäneñ yañadan tözekländerelüe häm tormışnıñ cayğa salınuı öçen härtörle tırışlıqnı kürsätä”, - dip äytüen citkerä.

“Sabah” gazetınıñ iqtisad säxifäsendäge “Törek iqtisadı ölgergänlegen isbatladı” dip atalğan yazmasında IMF fondınıñ wazıyfası tämamlanğan Törkiyä bülege citäkçese Mark Lewisnıñ: “Global krizisqa qaramastan Törkiyä iqtisadı nıq torışı mäs’äläsendä ölgergänlegen isbatladı”, - dip äytüen belderä. Gazet Lewisneñ Törkiyäneñ monnan arı burıç aluçı tügel, burıç birüçe il buluına basım yasawın citkerä.

“Yäni Şafak” gazetı “Saqlanuda basqıç basmasına kütäreldek” isemle yazmasında Törkiyä saqlanu sänäğäteneñ däw oyışması “ASELSAN”nıñ (xärbi elektronika sänäğäte) dönyanıñ iñ zur 100 saqlanu sänäğäte oyışmaları isemlegendä kütärelergä däwam itüen belderä. Gazet üzäge Amerika Quşma Ştatlarında urnaşqan atnalıq “Defense News” jurnalı bilgelägän “Top 100” isemlegendä “ASELSAN”nıñ’uzğan yıldağı 74nçe urınnan bıyıl 67nçe urınğa kütärelüen yaza.

“Star” gazetı “Urta diñgez mäydanında iñ küp turist alğan ikençe il” isemle yazmasında Urta diñgez turistik qunaqxanäçelär häm eşxanälär berlegeneñ avgust ayındağı byulletenenä kürä, ğinwar-iyün aylarında Urta diñgez mäydanında iñ küp turistnı qunaq itkän ikençe ilneñ Törkiyä buluın assızıqlıy. Şuşı çorda Törkiyäneñ 15 million 238 meñ turistnı qabul itüe belderelgän yazmada Törkiyä turizmınıñ 6 aylıq däwerdä uzğan yılnıñ şul uq çorına qarağanda 4.73% üsüe äytelä.

“Hürriyät” gazetı “Ebola frontında 2 yaxşı xäbär” isemle yazmasında Amerika Quşma Ştatları belgeçläreneñ böten dönyanı kiyerenke qılğan üterüçe ebola virusına qarşı vaktsinanıñ 2015nçe yılğa qädär qamilläştereläçägen ömet itülären belderä häm belgeçlärneñ ike xastağa birelgän maxsus sıyıqlıqnıñ bik uñay näticä birüen açıqlawların yaza.

“Habärtürk” gazetı “Furkan Bayrak dönya çempionı” isemle yazmasında Xorvatiyadağı Bötendönya yäşlär köräş çempionatında törek sportçısı Furkan Bayraknıñ 74 kiloda İran köndäşe Payma Bouyerine 4-2 isäbe belän ciñep, dönya çempionı buluı turındağı xäbärne citkerä.