Törek matbuğatına küzätü 28.06.2014

“Sabah” gazetı Tışqı eşlär ministrı Äxmät Dawıtoğlunın “regional oyışmalarnıñ aradaşçılıqta artqan role” temalı öçençe İstanbul aradaşçılıq konferentsiyäsendäge çığışın täqdim itep, ministrnıñ Ğiraq häm Süriyä krizisı belän bäyle bularaq: "BMO İminlek Şurasınıñ döres waqıtta döres humanitar, global qimmätlärgä bağlanıp, tormışqa aşıra almağan initsiativaları arqasında bu wazğiyätkä kilep citelde”, - digän süzlären urnaştırğan.

“Yäni Şafak” gazetı "Ike köndä 1 elektr stantsiyäse” dip atalğan yazmasında Törkiyä energetika häm tabiği çığanaqlar ministrı Tanär Yıldıznıñ 2014nçe yılnıñ berençe biş ayında 101 elektr stantsiyäseneñ eşli başlawın äytüen yaza.

“Milliyät” gazetı Törkiyädä eşläp çığarılğan tankka berençe märtäbä reaktiv bronyalı saqlaw üzençälegeneñ qazandırıluın xäbär itä.

“Hürriyät” gazetı TRT ğomum mödire İbrahim Şahinnıñ teleradiokompaniyanıñ kiläse çordağı eşçänlegen bäyäläwen belderä.

Gazet bıyıl TRTneñ 50, törek kinosının 100 yıllığın qotlawın xäterlätüçe Şahinnıñ TRTneñ wazıyfalarınnan berseneñ dä kino tarmağına öleş kertü buluın äytüen, monıñ öçen TRT bularaq 30 televizion filmnı töşerü qararın qabul itülären belderüen citkerä.

Yazmada Şahinnıñ: “Törkiyädä äle haman taswirlanmağan xikäyälär buluına ışanabız. Tsenariye bulğan, şirkät yäki şäxeslär bulmasın, ayırması yuq, kem genä bulmasın, 31nçe iyülgä xätle bezgä möräcäğät itä ala. Bolar arasınnan utızın saylap alıp TV filmın töşeräçäkbez. Bez härkem yasağan tügel, berkem dä tormışqa aşırmağan, başqaru qıyulığı bulmağan eşlärgä totınabız. Bu räweşle tarmaqqa yaña tsenaristlarnı, uyınçılarnı häm produsserlarnı qazandırunı maqsat itäbez”, - dip äytüe belderelä.