Törek matbuğatına küzätü 17.06.2014

“Yäni Şafak” gazetı Törkiyägä kilgän NATO Ğomum särkätibe Anders Fogh Rasmussennıñ İlbaşı Abdullah Gül tarafınnan qabul itelüen xäbär itä. Gazet Gülneñ wazıyfası közen tämamlanaçaq Rasmussenğa Ğomum särkätip bularaq wazıyfa başqarğan çaqta kürsätkän xezmätläre öçen räxmätlären citkerüen yaza. Yazmada Ğomum särkätip Rasmussenneñ sentyabr ayında ütkäreläçäk NATO Galler sammitınıñ kön tärtibendä bulğan mäs’älälär xaqında İlbaşı Gülgä mäğlümat birüe äytelä.

Söyläşü waqıtında ayıruça Ğiraq, Ukraina, Süriyä häm Äfğanstandağı wazğiyät kebek könüzäk regional mäs’älälärneñ dä quzğatıluı assızıqlanğan yazmada Rasmussennı soñınnan Premyer-ministr Räcäp Tayyip Ärdoğannıñ qabul itüen belderä. Gazet söyläşüdä Törkiyäneñ Äfğanstandağı ISAF qarşındağı eşçänlege belän Ukrainadağı täräqqiyätlärneñ tikşerelüen dä yaza.

“Star” gazetı “Dönyanıñ iñ zur portı da yulda” dip atalğan yazmasında Premyer-ministr Räcäp Tayyip Ärdoğan tarafınnan dönyanıñ iñ zur hawa mäydanınıñ nigeze salınğannan soñ tağın ber däw proyektnıñ telgä alınuın belderä. Yazmada hawa mäydanı tiräsendä 3nçe küper häm “Kanal İstanbul” eşçänlegennän soñ dönyanıñ iñ zur “Port qalası”nıñ tözeläçäge xäbär itelä.

“Akşam” gazetınıñ iqtisad säxifäsendäge “Törek hawa yullarınnan 1 milliard 600 million dollarlıq oçqıç zakazı” isemle yazmasında Törek hawa yullarınıñ Amerikalı “Boeing”qa däw zakaz birüe turındağı xäbärne citkerä.

“Habärtürk” gazetı “Dönyanıñ ber meñençe mirası Törkiyädän bulsın” isemle yazmasında BMOnıñ mağarif, belem häm mädäniyät oyışması UNESCOnıñ Dönya miras komitetına äğza itep saylanğan Törkiyäneñ unnarça il möräcäğät itkän Dönya mirası isemlege öçen berençe tapqır östälneñ ikençe yağında utıraçağın belderä. Gazet isemlekkä kerteläçäk meñençe obyekt bilgelänäçäk cıyılışta Törkiyädän dä “Bursa häm Cumalıkızık” belän “Bergama” dosyeläreneñ qaralaçağın yaza.