Tarixta ez qaldırğan törkilär 26

Dönyaküläm tanılğan törki şäxeslär turında süz alıp barğanda barı tik mädäniyat, fän-belem häm säyäsät tarmağında ğına tügel , uñışları belän sport ölkäsendä dä tirän ez qaldırğan keşelärgä tuqtalu zarur. Çönki sport tarmağına küz salğanda distälärçä törki şäxesneñ dönyaküläm yarışlarda berençe urınnarğa layıq buluın küräbez. Bügenge yazmabızda şundıy sportçılardan berse- bilyard buyınça dönya çempionı Sämih Saygınär turında süz alıp barabız.

Sämih Saygınär 1964 nçe yılnıñ 12 nçe noyabrendä Törkiyädä Sakarya viläyäteneñ Adapazarı ilçäsendä dönyağa kilä.Ätise Faruk bay-tegüçe, änise- Süräyya xanım xucabikä bula. Sämih äti-änisen 14 yäşendä ber yul häläkätendä yuğalta. Bu awır teträndergeç waqiğadan soñ ul mäktäpne taşlıy. Berazdan imtixannar tapşırıp, İndustriya hönär litseyınıñ elekr bülegenä uqırğa kerä. Sämih psixologik problemaları arqasında mäktäpne tögälli almıy häm bilyard uynawğa kereşä. Bu eşkä birelep kitep,tormışındağı barlıq awırlıqlarnı, tiskäre waqiğalarnı onıtırğa tırışa. Ber iptäşeneñ kiñäşen istä totıp 1981 nçe yılda 17 yäşlek yäşüsmer berençe tapqır İstanbul çempionatında qatnaşa häm berençe urınnı yawlıy.

Sämih qısqa waqıt eçendä Törkiyädä tanılsa da bilyard uynaw belän genä kön kürep bulmawın añlap abıysınıñ şirkätendä eşli başlıy. 1986 nçı yılda xärbi xezmättän qayta häm İstanbulda ber bilyard zalında eşkä urnaşa. Yaratqan hönären kamilläşterüne däwam itterä. Ul üzenä xalıqara yarışlarda qatnaşıp uñışqa ireşüne maqsat itep quya. 1988 nçe yılda Törkiyädä ütkärelgän xalıqara turnirda qatnaşuçı Sämih dönya çempionnarı yanında üz säläten kürsätügä ireşä. Annan son küp kenä xalıqara turnirlarda qatnaşıp, üz köçen kürsätä. 1991 nçe yılda German Open turnirında häm şul uq yılnı uzdırılğan İstanbul Efes Pilsen Grand Prix turnirında tuğızınçı urınğa layıq bula. 1992 nçe yılda Germaniyada oyıştırılğan dönya kubogında uñışlı çığış yasap ul yılnıñ dönya çempionı Raymond Ceulemansnı 3-0 isäbe belän ciñügä ireşä häm üz isemen dönyağa tanıta.

Sämih Saygınärneñ älege uñışlarınnan soñ Törkiyädä Bilyard Federatsiyäse qorıla häm sälätle yäşlärgä yaqlaw kürsätä başlıy. Sämih 1994 nçe yılda Belgiyädä ütkärelgän Gent dönya çempionatında berençe urınnı alıp , dönya kubogın qazana .

Sämih Saygınär şul uq yılnı bilyardnıñ iñ tanılğan ligası bularaq belengän Gollandiya komandalar ligasına küçä. 4 yıldan soñ Antalya Kämärdä uzğan Bilyard buyınça dönya çempionatında gollandiyäle köndäşe Cerwin Walentijnne ciñep, dönya çempionı bula.

Tuplam 25 tapqır Törkiyä Grand prix çempionı bulğan Sämih Saygınär 14 tapqır Törkiyä çempionı bula.Sportçı karambolda 10 tapqır Törkiyä çempionı buluğa ireşä. Sämih mondıy uñışları belän küp kenä büläklärgä layıq bula. Törle cirlärdän “Yılnıñ sportçısı” bülägenä layıq kürelgän Saygınär , 2004 nçe yılda Belgiyada 2003 nçe yılnıñ “İñ yaxşı bilyardta uynawçısı” itep saylana. 2006 nçı yılda UMBnıñ (Union Mondiale de Billard) dönyaküläm sportçıları isemlegendä 8 nçe urında bulğan Sämih , 3 yıl däwamında Portugaliya ligasında FC Porto Bilyard komandasınıñ kapitanı bula. 2005 nçe yılda F.C.Porto komandası belän Awrupa klubları çempionatında bronza medal qazana, şul uq yılnı Awrupa klubları çempionatında 2 nçe ligaga iyä bula.

Sämih Saygınär 1995 nçe yılda Aygän Berk isemle sportçı belän ğailä qorıp cibärä. Ämma bu ğailä ozın ğomerle bulıp çıqmıy, alar berazdan ayırılışalar.

Törkiyädä bilyardnıñ tanıluına zur öleş ketkän Sämih Saygınär 1996-1997 nçe yıllarda Bilyard Federatsiyäsen citäkli.

Sämih dönyaküläm bilyard dairäsendä “Turkish Prince” (Törek printsessı) ) häm “Mr. Magic” (Sixerle bäy) )quşamatları belän tanıla. Köndäşläre arasında anıñ turında “Sämih üz aldına maqsat quyğanda ciñä almıy torğan keşese yuq”digän süz taraluı da äytelä.