Yütälne niçek beterergä?

Su

Öske sulış yulları infekŝiyase arqasında ağuçı borın tamaq töben yarsulatıp, yütälgä kiterä. Bu ağunı küp su êçü tuqtata ala. Su şulay uq tamaq töbeneñ dımlı qaluına bulışa. Könenä kim digändä 2 litr su êçü zarur.

Ballı suğan

Yütälgä qarşı suğan da bulışa. Monıñ öçen 1 baş suğannı 4kä bülep, 1 stakan suda qaynatabız. 5 minut qaynatqannan soñ uttan alıp, suıtabız. Sözep, bal quşıp, êçäbez.

Açı torma 

Açı torma reśeptı birep uzabız. Tormanıñ êçen ӓsterxan çiklӓwege zurlığında alabız. Ber yarım çӓy qaşığı bal salıp, torma astına tӓlinkӓ quyabız hӓm bal şunda ber tӓwlek buyı torırğa tiyeş. Annarı tormadan tӓlinkӓgӓ aqqan sıyıqlıqnı qullanabız.

Sarımsaqlı, koriŝalı êçemlek

Şulay uq ber stakan qaynar suğa ber tırnaq sarımsaq häm 2 koriŝa tayaqçığı quşıp, 5 minut tönätkännän soñ êçärgä bula.

Söt

Yütälgä qarşı söt tä faydalı. Ber stakan sötne qaynatıp, yartı çäy qaşığı qara borıç salıp, êçäbez. Bal da quşarğa mömkin.

İmbir’ häm bal

Kipterelgän häm uılğan imbir’ne bal belän butap, aşağannan soñ qabu faydalı.

Limon

Ber limonnı dürtkä bülep, ber telemenä qara borıç häm toz sibep, aşaw da bulışa.

Mindal’le äflisun soğı

Mindal’le äflisun soğın äzerläw öçen çi mindal’lärne robottan uzdırabız. 1 çäy qaşığı uılğan mindal’ belän ber çınayaq äflisun soğın butıybız. Här irtä häm kiç eçäbez.

Çäylär

Yükä, gölcimeş, şalfey, imbir’, bötnek çäyläre yäisä êçemleklär yütälne ciñeläytergä yärdäm itä. Çäygä bal quşu da yütälgä qarşı bulışa. Bal tamaq töbendäge qorılıqnı beterep, anı yomşarta.

Qara borıç häm bal

Tağın ber reŝept belän büleşik. Yartı çäy qaşığı qara borıç häm 2 aş qaşığı balnı ber çınayaqta bolğatabız. Östenä beraz suıtılğan qaynağan su östäp, 15 minut qaplap torabız häm sözep êçäbez. Bu êçemlek qaqırıqlı yütälne beterergä bulışa.

C vitaminı

Yütälne beterer öçen C vitaminına bay rizıqlar aşarğa kiräk. Yütäl öske sulış yulları infekŝiyase arqasında barlıqqa kilgändä greypfrut, mandarin, äflisun häm limon kebek ŝitruslılar belän bergä käbestä, kura ciläge, pomidor, şpinat, yäşel fasol’, borçaq häm suğan kebek C vitaminı bulğan yäşelçä häm ciläk-cimeş aşaw faydalı.

Tämäke tartunı taşlaw

Tämäke tötene dä öske häm asqı sulış yulın yarsulandıra. Şulay uq sulış yulın saqlawçı mexanizmnarğa da zıyan sala. Tämäke tartasız ikän, taşlağız.

Dımlılıq

Öydäge qorı hawa sulış yulların qorıtıp, yütälne arttıra aluçı möhim faktor bulıp tora. Öyneñ dımlılıq däräcäsen ideal’ xalätkä kiterü öçen cihaz qullana alasız. Batareyalar östenä yüeş tastımal da quyarğa bula. Dımlılıq däräcäseneñ 30-50% arasında buluına iğtibar itärgä kiräk. Läkin dımlandıruçı cihazlarnı ozaq waqıt qullanudan taypılu zarur. Şulay uq bülmäne här kön cillätergä dä onıtmıybız.

Duş

Cılı duşka kerü borın ağunı ciñeläytä, yütälne azaytırğa bulışa. Cılı vannadağı par allergiya häm astmağa bäyle yütälgä qarşı da yärdäm itä.

Ximiya belän iğtibarlı bulu

Xuşbuy häm belizna qullanğanda da iğtibarlı bulırğa kiräk. Alar da tamaq töben yarsulandırıp, yütälgä kiterä.

19.00dan soñ aşamaw

Reflyukstan integäsez ikän kiçke 7dän soñ aşawnı tuqtatırğa kiñäş itelä. Çäy, qahwä, gazlı êçemleklär häm şokolad kebek reflyuksnı arttıruçı azıq-tölek häm êçemleklärdän taypılığız. Yatqanda mendärne kütärtep quyarğa onıtmağız.

Allergiya bulğanda

Allergiya buğan keşelärdä dä yütäl küzätelä. Mondıy çaqta çaralar kürergä kiräk. Yonnan tegelgän mayka, mendär, yurğan belän kelämnär qullanmasqa kiräk. Yurğan häm mendär tışların kim digändä 55 däräcä häm yuğarıraq temperatırada yuu zarur. Karawat cäymäse häm pärdälär dä mamıqtan bulırğa tiyeş.

Allergiyağa awışlı bulsağız, öydä mömkin qadär äz mebel’ totığız. Tuqımalı mebel’ urınına kün, sintetik yäisä ağaçtan yasalğanın saylağız. Tuzan cıyuçı äyberlärne şkaf êçendä totarğa tırışığız.

Avtor – tabib Mäxmät Uçar