Ükçä tirese kibep yarılğanda nişlärgä?

“Sälamät bulıyq” tapşıru tezmäbezneñ bügenge çığarılışında ükçä tirese kibep yarılğanda faydalı bulğan tabiği däwalaw ısulları xaqında süz alıp barabız.      

Limon

 Ükçä tirese yarılğan oçraqta cılı suğa limon suı häm toz östäp ayaqlarığıznı bu suda 15 minut totığız.

Annarı ükçäläregezne pemza belän çistartığız häm ayaqlarığıznı çista su belän yuıp sölge belän sörtegez.

Bu ısulnı qullanğanda şuña iğ’tibar itärgä kiräk: su bik êsse bulmasqa tiyeş. Çönki qaynar su tireneñ kibüenä, qıtırşılanuına  kiterä häm ükçälär kübräk yarılırğa mömkin.

Limonnı sıqqannan soñ qabığınıñ êçke yağı belän ükçälärgä massaj yasaw da faydalı.

Alma serkäse

Cılı suğa 2-3 aş qaşığı alma serkäse quşığız häm ayaqlarığıznı bu suda 15 minut totığız. Ayaqlarığıznı sudan çığarğannan soñ pumiśa taşı belän çistartu kiñäş itelä.

Çäy sodası

Ägär ükçälär yarılsa tübändäge reśept ta yärdäm itä: 2 qaşıq çäy sodasına 3-4 tamçı limon sogı quşığız. Cılı su belän yuılğan ükçäläregezgä älege qatnaşmanı sörtep 10 minutqa qaldırığız. Annarı ayaqlarğıznı yuığız häm dımlandırığız.

Üsemlek mayları

Zäytün mayı, kokos mayı, köncet mayı yäki badäm mayı (mindal’ mayı ) kebek tire öçen bik yaxşı bulğan bu maylarnıñ urtaq üzençälege – alar tirene tabiği dımlandıra.

Ükçä tirese yarılğan oçraqta su salqınaya başlağançı utırğaç, ükçälärne pemza belän ışqığız. Annarı ayaqlarnı yaxşılap yuıp sörtergä häm bu maylardan besren sörtep massaj yasarğa kiräk. Monnan soñ ayaqlarığızğa oyıqbaş kiyep yoqlağız.

Sez bu ısulnı ükçä tirese tözälgänçe, yomşarğançı qabatlıy alasız.

Çäy ağaçı êfir mayı

Ayaqlarığıznı cılı su belän yuıp sörtkännän soñ ükçäläregezgä çäy ağaçı êfir mayı tamızıp massaj yasağız. Oyışbaş kiyep anı töngä qaldırığız.

Vazelin

Ayaqlarnı cılı suda totqannan soñ ükçälärne pemza belän çistartığız. Annan soñ vazelin sörtegez. Oyıqbaş kiyep yoqlarğa yatığız. Bu prośeduranı yoqlarğa yatar aldınnan ütkärü kiñäş itelä. Ägär teläsägez vazelinğa ber çäy qaşığı lmon sogı da östi alasız.

Avokado

Yartı avokado belän 1 banannı izep quşığız. Bu qatnaşmanı yarılğan urınnarğa sörtegez, 20 minuttan yuıp töşeregez.

Dımlandırğıç krem

Ayaqlarnı här kiç cılı suda yuıp pemza belän çistratqannan soñ ayaq tabannarına dımlandırğıç krem sörtü bik faydalı, bolay êşlägändä ükçä tireseneñ yomşarıp qalğanın kürersez.

Bu ısulnı här duştan soñ qullanu ükçälärdä yarıqlarnı buldırmıy.

Bal

Cılı su salınğan tabaqqa beraz bal salıp bu suda ayaqlarığıznı 15 minut tiräse totığız. Annan soñ ayaqlarnı çista su belän yuıp, sörtep pemza belän ışqırğa kiräk.

Bal häm zäytün mayı

1 çäy qaşığı bal belän 1 aş qaşığı zäytün mayın yaxşılap bolğatığız. Bu qatnaşmanı ükçäläregezgä sörtep 20 minut kötegez.

Ölgergän banan

Ölgergän banannı yaxşılap izep yarılğan ükçälaregezne anıñ belän ışqığız. Annarı bu massanı ükçäläregezdä 10 minutqa qaldırığız häm cılı su belän yuığız. Bu prośeduradan soñ ayaqlarnı 5-10 minut salqın suda totu kiñäş itelä.

Döge onı

Döge onı tupas tiredän arınırğa yärdäm itä. 1 uç döğe onın berniçä çäy qaşığı bal häm alma serkäse belän quşıp yaxşılap bolğatığız. Ayaqlarnı 10-15 minut cılı suda totqannan soñ sörtegez häm älege qatnaşmanı ükçälärgä qullanığız. 

Êpsom tozı

Ber çiläk cılı suğa êpsom tozı salıp bu suda ayaqlarığıznı kim digändä 10 minut totığız, üle tirene pumiśa taşı belän qırığız. Annarı qabat tozlı suda 10 minut totıp, ayaqlarığıznı sörtep dımlandırğıç sörtegez.

Gölçäçäk häm gliśerin

Gliśerin belän gölçäçäk suın tigez külämdä quşığız. Bu prośeduranı yoqlar aldınnan êşlägez. Qatnaşmanı ükçäläregezgä häm ayaqlarığızğa sörtep oyıqbaş kiyegez häm yoqlarğa yatığız.

Avtor: Tabib Mäxmät Uçar