Tatarstan xäbärläre 4/2024

Tatarstan Räise häm Qatar ämire iq’tisadi êlemtälärne nığıtu xaqında fiker alıştı

Tatarstan Räise Röstäm Miňnexanov Qatar däwläte ämire şäyex Tämim bän Xamad Äl Tani belän oçraştı.

“Sezneň il –Yaqın Könçığış töbägendä Rusiyäneň möhim häm ışanıçlı partnyerı. Tatarstan üz däräcäsendä Rusya - Qatar mönäsäbätlären nığıtuda yärdäm itärgä tırışa”,- dip iskärtte Tatarstan citäkçese.

Qatar ämire üz ileneň Rusiya töbäkläre, ayırım alğanda, Tatarstan belän iq’tisadi êlemtälärne nığıtuğa qarata qızıqsınu belderüen rasladı. 

Tatarstan Räise Şäymiyevne tuğan köne belän qotladı

Tatarstan Räise Röstäm Miñnexanov Tatarstannıñ berençe ilbaşı, respublikanıñ däwlät kiñäşçese Mintimer Şäymiyevne tuğan köne belän qotladı. 20 nçe ğıynwarda aña 87 yäş’ tuldı. Tatarça qotlawda Tatarstan citäkçese Mintimer Şäymiyevkä respublika häm il faydasına quyğan xezmäte öçen räxmät belderde, şulay uq aña nıqlı sälamätlek häm ozın ğomer teläde.

Qazan fevral’ ayında säyäxätlär öçen top -10 yünäleşkä kerde

Qazan fevral’gä bron’lar sanı buyınça top -10 turistik yünäleşlär isemlegenä kerde. Şul uq waqıtta Tatarstan başqalasına kilergä teläwçelär sanı ber yıl êçendä 16%qa artqan.

Reytingta Qazan tuğızınça urında tora. Lider bulıp Mäskäw, annan soñ Sankt-Peterburg häm Murmansk urnaşa.

Yaña yıl bäyrämnärendä Qazanğa 169 meñ turist kilgän. Bu çorda urnaştıru çaralarınıñ urtaça yökläneşe 77% täşkil itä, ä 3-5 nçe ğıynwarda 90%qa citä.

Million möselmanğa turı kilgän mäçetlär buyınça tatarlar Rusiyädä berençe urında

Qazaqstannıň Almatı şähärendä yäşäwçe İldar Şärifkul törle töbäklärdä häm illärdä 1 million möselmanğa turı kilgän mäçetlär sanın isäpläp çığarğan. Bu isemlektä Tatarstan berençe urında tora.

Rusiya töbäkläre buyınça 1 million möselmanğa turı kilgän mäçetlär sanı tübändägeçä:

1.Tatarstan - 750

2.Çäçänstan - 630

3.Dağıstan - 567

4.İnguşetiya - 400

5.Başqortstan- 270.

Avtor nigez itep, çağıştıru öçen, Törkyäne alğan, anda 1 million möselmanğa 1000 mäçet turı kilä. Tatarstanda xäzer 1582 mäçet bar. Üzäk Aziya illäre buyınça, 1 million möselmanğa turı kilgän mäçetlär sanı:

1.Qırğızstan - 380

2.Tacikstan - 300

3.Qazaqstan - 227

4-5.Üzbäkstan häm Törekmanstan - 66

İldar Şärifkul – milläte yağınnan tatar. Ätise tumışı belän –Taşkenttan, babaları - Tübän Novgorodtan. Ul üze din belgeçe bulırğa uqığan, 5 yıllıq pedagogik stajı bar, xäzerge waqıtta üzmäşğul’, vizalar belän şöğıl’länä.

“Oyasında ni kürsä” digän ädäbi bäyge uza

2024 nçe yıl – Rusiyädä Ğailä yılı uňayınnan Tatarstan Respublikası Räise qarşındağı Tatar telen häm Tatarstanda yäşäwçe xalıqlar wäkilläreneň tuğan tellären saqlaw häm üsterü mäs’äläläre komissiyäse “Qazan utları” jurnalı redakŝiyäse belän berlektä qaläm iyäläre häm mäktäp uquçıları arasında “Oyasında ni kürsä…” digän ädäbi bäyge iğ’lan itä.

Älege konkursnıň maqsatı – cämğıyät’tä ğailä institutınıň rolen nığıtu, tradiŝion qıymmätlärne saqlaw.

Näq’ menä ğailädä keşeneň şäxese, dön’yağa qaraşı, fälsäfi küzallawları, anıň ruxi-äxlaqıy idealları formalaşa. Tatar xalqınıň ruxiyät tarixına küz salsaq, anıň nigezen berençe çiratta ğailä täşkil itkänlegenä inanabız. Älege bäyge nıqlı, tatu näsellär, ğailälär turındağı ädäbi äsärlärgä bağışlana di oyıştıruçılar.

Konkurs ber turda 2024nçe yılnıň 1 nçe fevralennän 10 nçı dekabrenä qadär ütkärelä. Ciňüçelärne iğ’lan itü häm büläkläw 2024 nçe yılnıň 18 nçe dekabrendä bula. Äsärlär tatar telendä yazılğan, moňa qadär massaküläm mäğ’lümat çaraları basmalarında, ayırım cıyıntıqlarda basılmağan bulırğa tiyeş.

Gorbanğulı Bärdemöxämmädov “Aqdus” nıň uňışlarına quana

Törekmänstannıň êlekkege ilbaşı Ğorbanğulı Bärdemöxämmadov 2021 nçe yılda Tatarstan Räise Röstäm Miňnexanovqa büläk itkän “Aqdus”nıň uňışlarına quanuın beldergän. Törekmän alabayı “Urta Aziya ovçarkası” nominaŝiyäsendä Rusiya kinologiya federaŝiyäse versiyäse buyınça Rusiya çempionı buldı. “Aqdus” ike büläkkä  -saf toqımlılıq häm maturlıq, şulay uq tiz töşenüçänlek häm iğ’tibarlılıq büläklarenä layıq buldı. Kategoriyädä 200 gä yaqın êt qatnaştı.

Tapşıruda Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.