Tatarstan xäbärläre 2/2024
Tatarstan häm tatar dönyasındağı qayber waqıyğalarğa qısqaça küzätü
“KAMAZ” - lider
2023nçe yılğa näticälär “KAMAZ” ğammäwi akśionerlıq cämğıyäteneñ üz tarmağında lider ikänlegen kürsätte. Şirkät yaña yök maşinaları satu küläme yağınnan Rusiyädä berençe urında. Monı ilneñ sänäğat’ häm säwdä ministrlığı mäğ’lümatları da dälilli.
“KAMAZ”lar häm alar bazasındağı maşinalar ildä satılğan yaña yök maşinalarınıñ 20%ın täşkil itä. Bu 140 meñ 204 berämlek transport çarasınıñ 28 meñ 237se.
Yar-Çallı gigantınıñ citäkçese Sergey Kogogin 2023nçe yılda rekordlı çista tabış alaçaqların farazlağan ide. Bıyıl şirkättä yañalıq kertep turistik avtobus proyektlarğa cıyınalar.
Rafil Noğmanov wafat
Yılnıñ berençe atnasında Tatarstannıñ atqazanğan yuristı, tanılğan xoquqçı, êçke êşlär ministrınıñ êlekkege urınbasarı, deputat Rafil Noğmanov 74 yäşendä wafat buldı.
Ul 1949nçı yılda tua, yurist belgeçlege buyınça yuğarı belem ala. 1978nçe yılda Rafil Noğmanov Tatarstan êçke êşlär sistemasında êşli başlıy. Aña şul waqıtta uq citäkçe wazıyfaların ışanıp tapşıralar.
1993nçe yıldan başlap 2009nçı yılğa qadär Rafil Noğmanov Tatarstan êçke êşlär ministrı urınbasarı bula. 2009nçı-2014nçe yıllarda isä Tatarstan parlamentında deputat. Ä ğomereneñ soñğı 3 yılında Noğmanov Tatarstan ictimağıy palatası räise urınbasarı ide.
Legendar general-mayornı Qazannıñ Märcani isemendäge mäçetennän soñğı yulğa ozattılar. Rafil Noğmanov Arça ziratına cirlände.
Fatix Kärimne iskä alu
Bügen tatarnıñ kürenekle şäxese - Fatix Kärimneñ tuğan köne. Ul 1909nçı yılnıñ 9nçı ğıynvarında tua. Tanılğan ädipneñ tuğan könendä Tatarstannıñ milli muzeyı maxsus çara oyıştırdı. Fatix Kärimneñ istälek taqtası yanında iskä alu uzdı. Şunnan soñ çara milli-muzıkal’ kiçä häm êkskursiyä belän däwam itte.
Bilgele bulğança, şağıyr’ 14 yäşennän başlap yaza häm tiz arada tanıla. Ul Stalin çorınıñ awırlıqları aşa uza, ber ğayepsezgä qulğa alına, lager’ğa cibärelä. Ğayepsezlege isbatlanğaç, Seberdän kire Qazanğa qayta häm Böyek Watan suğışına çığıp kitä. 1942nçe yılnıñ fevralennän 1945nçe yılnıñ fevralenä qadär näq’ 3 yıl Fatix Kärim frontnıñ alğı sızığında bula, 2 tapqır yaralana, batırlıqları öçen orden-medal’lär belän büläklänä. Tik aña Ciñü könen kürü nasıyp bulmıy. Ädip 1945nçe yılnıñ 19nçı fevralendä Könçığış Prussiyädäge soñğı suğışlarnıñ bersendä 36 yäşendä hälaq bula.
Qazan - Yaña yıl bäyrämendä säyäxät itü öçen iñ şäp urın buldı
Qazan qışın säyäxät itü öçen rusiyälelär arasında iñ populyar 10 yünäleş isemlegenä kergän. Şähärlärne soraştıru aşa açıqlıylar. İsemelektä berençe öçlektä Sankt-Peterburg, Kaliningrad häm Krasnaya Polyana. Anda toraq bron’lawştıruçılar iñ kübe. Reytingnıñ dürtençe häm bişençe şähärläre bulıp Böyek Ustyug häm Kislovodski tora. Tatarstan başqalası altıncı urında. “Êksperiment çistalığı öçen Mäskäwne isemlekkä kertmädek, ğomumän alğanda, ul totrıqlı räweştä berençe öçlekkä kerä”,-di oyıştıruçılar.
Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı. Tatarstan räiseneñ räsmi portalı häm başqa räsmi çığanaqlardan faydalanıldı.
