Faringit bulğanda nişlärgä?

“Sälamät bulıyq” tapşıru tezmäbezneñ bügenge çığarılışında faringit bulğanda nişlärgä kiräklege turında tabib kiñäşlären täq’dim itäbez.  

Faringit - awız häm borın quışlıqları artındağı yotqılıqnıñ yalqınsınuı ul. Faringit bulğanda yotqan waqıtta tamaq töbendä awırtu sizelä, ul qıtıqlana - qımırcıy.

Faringitnı niçek kisätergä?

• Qullarnı yaxşılap häm regulyar räweştä yuarğa
• Yötkergändä yäki töçkergändä awıznı häm borınnı qaplarğa
• Yoğışlı virus yäki bakteriya infekśiyäse bulğan keşelär belän tığız êlemtädä tormasqa
• Tämäke tartudan häm tämäke tötenennän saqlanırğa
• Tuzanlı urınnardan häm pıçraq hawadan yıraq torırğa
• Artıq qaynar häm salqın rizıqlar aşawdan saqlanırğa
• Êş häm yäşäw urınnarın yışraq cillätergä
• Ximik matdälärdän saqlanırğa kiñäş itelä.

Faringit waqıtında nişlärgä?

Kön däwamında küp sıyıqlıq êçü, cılı tozlı su belän tamaqnı çayqaw, tawıq şulpası êçü, yal itü - faringit öçen faydalı tabiği ısullar.

Faringit belän awırğanda

• Romaşqa, bötnek, çınağaç, êxinaŝiya, yükä, tatlı tamır  üsemleklärennän yasalğan tönätmälär êçärgä
• Tamaq kibüen beterü öçen küp sıyıqlıq êçärgä
• Cılı tozlı su belän tamaqnı çayqarğa
• Bal qullanıp tamaqnıñ ärnüen kümetergä
• Tönlä tamaq qorı bulırğa mömkin, şuňa kürä waqıt-waqıt cılı su êçärgä
• Tawıq şulpası êçärgä
• Yal itärgä kiräk.

 Faringit bulğanda nindi ısullar yärdäm itä?

Şalfey häm êxinaŝiya ülännäre qullanığız

Êxinaŝiya häm şalfey tamaqtağı awırtunı häm qımırcawnı ciňeläytä. Şalfey – antibakterial’ ham antiseptik. Êxinaŝiya immun sistemasın nığıta. Şalfey belän tamaqnı çayqıy alasız yäki anı tönätmä yasap ta êçärgä bula.

Şalfey tönätmäse äzerläw öçen 1 stakan suğa 1 çäy qaşığı şalfey yäki 1 paket şalfey üläne, yäisä 4-5 gramm kipkän şalfey qatnaşmasın salıp sürän utta 10 minut qaynatırğa kiräk. Bu tönätmä belän könenä 2 yäki 3 tapqır tamaqnı çayqağız. Älege qatnaşmanı 24 säğat’ êçendä qullanırğa kiräk.

Sarımsaq aşağız

Tamaq töbe awırtqanda sarımsaqnı yış qullanırğa bula. Anı qullanunıň iň yaxşı ısulı – çi kileş çäynäw yäki ber kisäk sarımsaqnı awızda 15 minut suıru. Çi sarımsaqnı yotunı ciňeläytü öçen bal yäki zäytün mayı quşa alasız.

Tağın ber reŝept – 1 çäy qaşığı tiräse sarımsaqnı uğıçtan uığız. Ber stakan suğa älege sarımsaqnı häm ber çemetem darçinnı quşığız. Bu qatnaşmağa 1 aş qaşığı  limon sogı quşıp 2 minut qaynatığız. Anı sözep köngä ike tapqır êçärgä mömkin.

Bötnek tönätmäse êçegez

Küp faydası bulğan bötnekne çäynäw faringit öçen dä yaxşı. Bötnek tamaq awırtuın kimetergä häm yötkerüne ciňeläytergä bulışa. Annan tönätmä yasap êçärgä dä bula.  

Alma serkäse

1 aş qaşığı organik alma serkäsen 1 stakan cılımsa suda bolğatırğa häm 1 qaşıq bal östärgä kiräk. Anı könenä 2-3 tapqır êçärgä kiňäş itelä. Tamaqnı alma serkäse belän çayqaw faringitnı däwalawda möhim rol’ uynıy, çönki ul bakteriyälärne üterä.

İmbir’

1 çäy qaşığı uılğan imbirne 1 stakan su belän 5 minut çaması qaynatırğa kiräk. Sözgannän soň berniçä tamçı limon häm 1 çäy qaşığı baş quşıp êçegez.

Kurkuma

Köngä ike tapqır tamaqnı çayqağanda faringitnı däwalawda citdi faydası buğan kurkuma qatnaşması yartı çäy qaşığı kurkuma poroşoğı häm 1 aş qaşığı toznı ber stakan suğa quşıp äzerlänä. Anı köndä 2-3 tapqır qullanırğa kiňäş itelä.

Bal

1 aş qaşığı bal häm 1 aş qaşığı organik alma serkäse quşıp äzerlängän qatnaşmanı 4 säğat’ sayın äzerläp qullanırğa bula.

Tozlı su belän çayqaw

2 stakan cılı suğa 3 çäy qaşığı toz quşıp äzerlängän qatnaşma belän awıznı çayqağannan soň tökeregez. Bu proŝeduranı könenä berniçä tapqır 3-5 kön däwamında êşlärgä mömkin.

Avtor: Tabib Mäxmät Uçar