Tatarstan xäbärläre 65/2023

İstanbulda Tatarstannıñ Tulı wäqalätle wäkillegeneñ yaña binası açıldı

Törkiyädä Tatarstannıñ Tulı wäqalätle wäkillegeneñ häm “Tatarstan” säwdä yortınıñ yaña binası açıldı. Bu waqıyğa Törkiyä partnyerları belän oçraşular häm xezmättäşlek öçen yaña mömkinleklär aça.

”Törkiyä - Rusiyäneñ häm bezneñ respublikanıñ töp partnyerlarınıñ berse. Uzğan yıl näticäläre buyınça bezneñ tovar äyläneşe 1,2 milliard dollarğa qadär arttı. Bezneñ bizneslarnı yaqınaytuda Wäkillek häm Säwdä yortı möhim rol’ uynıy. Alar Törkiyädä 25 yıldan artıq êşli”,- dip belderä Tatarstan Räise Röstäm Miñnexanov.

Bina İstanbulnıñ Aziya öleşendä, Beykoz rayonında urnaşqan. Tantanada Rusiyäneñ İstanbuldağı general’ konsulı Andrey Buravov,Beykoz muniśipalitetı citäkçese Murat Aydın, İstanbul gubernatorı urınbasarı Özläm Bozkurt Gävräk qatnaştı.

Tatarstan citäkçeseneñ matbuğat xezmäte mäğ’lümatlarına qarağanda, Törkiyä investorları Tatarstanda 10 zavod açqan, ä investiśiyälärneñ küläme 2 milliard dollarğa citä. Üz çiratında Tatarstan partnyerlarğa neft’, sintetik kauçuk, plastmassa êşlänmälär, sintetik yuu çaraları, mex, tire, mebel’, farmaśevtika häm produkśiyäneñ başqa törlären cibärä.

Tatarstan Räise Teläçe konditerın İstanbulda şef-peşekçelär yarışında ciñüe belän qotladı

Tatarstan Räise Röstäm Miñnexanov Teläçe konditerı Läylä Kaşapovanı Törkiyädäge xäläl kürgäzmädä (OIC Halal Expo 2023) şef-peşekçelär bäygesendä ciñüe belän qotladı. “Tatar aşları dön’yada iñ tämlese! Xalıqara jyuri da monı tanıy! Qotlıybız”,- dip yaza respublika citäkçese üzeneñ Telegram kanalında.

Turistlar Qazannı qunaqçıllıq häm mädäniyät sintezı öçen saylıy

Yaňa yıl bäyrämnärendä Qazanda küpsanlı turistlarnı kötälär. Xäzerdän ük qunaqxanälärneň urtaça yökläneşe 65-75% dip bäyälänä.

Bügenge köndä iň zur yökläneş 31 nçe dekabr’gä, 1-5 nçe ğıynwarğa turı kilä. Yaňa yıl bäyrämnäre öçen saylawlarnı yaxşı transport infrastrukturası belän aňlatalar: şähärneň oçış programması kiň qırlı, timer yul transport raspisaniyese uňaylı, avtosäyäxätçelär öçen uňaylı marşrutlar. Şulay uq Tatarstan qunaqçıllığı, milli kolorit häm mädäniyät sintezı da möhim rol’ uynıy.  

Qazan - ul tarix, arxitektura, gastronomiya häm küňel açular şähäre. Tatarstan başqalası törle kategoriya turistlar öçen öçen açıq. Uzğan yıl Yaňa yıl kanikulları könnärendä 31 nçe dekabr’dän 8 nçı ğıynwarğa qadär Tatarstan başqalasında 160 meňgä yaqın qunaq bulğan.

Qazanda urtaça xezmät xaqı artqan

Qazanda aylıq urtaça xezmät xaqı 73 meň sumğa citkän. 2023 nçe yılnıň 9 ayında xezmät xaqı zur häm urta predpriyätiyelärdä 73 meň sumnan artıp kitkän häm uzğan yılnıň şul uq çorı belän çağıştırğanda nominal’ isäpläwdä 17,6%qa, real’ kürsätkeçlärdä 12,6%qa artqan. İň yuğarı xezmät xaqları hönäri fänni-texnik êşçänlektä, finanslar, mäğ’lümatlaştıru häm êlemtä, sälamätlek saqlaw häm ênergetika ölkälarendä terkälgän. Berençe yartıyıllıqta Qazan Rusiyäneň millionlı şähärläre arasında xezmät xaqı däräcäse buyınça 6 nçı urınnan 4 nçe urınğa kütärelgän.

Qazanğa çit töbäklärdän tatar êşmäkärläre cıyıldı

Tatarstan başqalası Qazanda XVI “Tatarstannıň êşlekle xezmättäşläre” forumı uzdı. Forumda Rusiya Federaŝiyäseneň 48 töbägennän häm 14 çit ildän 300 gä yaqın tatar êşmäkäre qatnaştı. Alar törle sekŝiyälärgä bülenep awıl xucalığı häm terlekçelek, sänäğat’, metallurgiya, maşina tözeleşe, säwdä, xezmät kürsätü ölkäse,tözeleş, küçemsez milek häm toraq-kommunal’ xezmät tarmaqları buyınça fiker alıştılar. Küzgä -küz küreşep söyläşü öçen mömkinleklär buldırıldı.

Yazmada Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.