Yasalma aqıl mediağa niçek yoğıntı (йогынты) yasıy?
Tormışnıñ qızıqlı yaqları - 52/2023
Tormışnıñ qızıqlı yaqları 52/2023
Yasalma aqıl texnologiyäläre här kön sayın yañalıqlar belän keşelekneñ qarşına çığa. Ul, başqa bik küp tarmaqlardağı şikelle ük, massaküläm mäğ’lümat dönyasında da bik küp uñay häm tiskäre üzgäreşlärgä säbäpçe bula ala
“Tormışnıñ qızıqlı yaqları” tapşıru tezmäbezneñ bu bülegendä yasalma aqılnıñ mediada niçek tiränten üzgäreşlär barlıqqa kiterä aluı turında süz baraçaq.
Yasalma aqılğa nigezlängän yañalıqlar, bik küp fayda belän bergä, êşsezlek häm cämğıyät’tä äxlaqıy problemalar kiterep çığarırğa mömkin.
Xäzerge waqıtta qullanuçılarnıñ kübese, yasalma aqıl yäisä algoritmnıñ mäğ’näsen dä belmiçä, köndälek tormıştağı sälamätlek häm belem aludan başlap, finans çığımnarına qadär barlıq şäxsi mäğ’lümatların älege algoritmda urtaqlaşa. Cıyılğan mäğ’lümatlarnıñ saqlanuı häm alarnıñ keşelärgä zıyan salu öçen qullanıla alu qurqınıçı bäxäslärgä säbäpçe bula.
Keşe aqılın imitaśiyäläwçe bu texnologiyä distopiyä belän utopiya arasında bik neçkä çik buluın häm älege çikne keşelärneñ prioritetları bilgeläwen kürsätä. Media tarmağı isä yasalma aqıl texnologiyäläre täêsire iñ nıq sizelgän mäydannarnıñ berse.
“Almost” media platformasına nigez saluçı häm baş möxärrire Kassi Ço belän “Goodable”nıñ idaräçese Möxämmät Lila yasalma aqıl texnologiyäläreneñ mediağa uñay häm tiskäre yoğıntısı häm anıñ bu tarmaqqa kitergän üzgäreşläre turında citkerä.
Kassi Ço algoritmnarnıñ mediadağı role turında bolay di: “Jurnalistlarnıñ iğ’tibarların tuplap üz êşlären başqaruı öçen alarğa kübräk irek birä alabız. Waqıtıbıznı interv’yularnı qäğaz’gä küçerü häm yazmanı tärcemä itü şikelle mäşäqat’lärgä sarıf itmiçä, tağın da näticäle êşlibez häm waqıtıbıznı tağın da yaxşıraq qullanabız”.
Ço yasalma aqılnıñ, keşelär tudırğan êçtäleklärgä nigezlänüe arqasında, yalğış fikergä yünältü mömkinlegen häm kamil bulmayaçağın äytä. Ul älege texnologiyäneñ cämğıyät’tä êşsezlek artuına kiteräçägen uylamawın belderde. Anıñça, yasalma aqılnı massaküläm mäğ’lümat çaralarında qullanu jurnalistlarnı tağın da yaxşıraq êşlärgä êtärä.
“Qayber keşelärneñ êşsez qala aluı bar, tik, minemçä, bu bezne tağın da icadi bulırğa därtländerä. Çönki fikerlärne yasalma aqıl birmi bit. Bu bezne tağın da yaxşı jurnalist bulırğa êtärä ala, çönki yaña ideyalar tudıru, yaña formatlar tabu, tağın da yaxşıraq êçtälek buldıru, tağın da yaxşıraq yazu öçen yasalma aqılnı niçek qullanırğa ikänen uylıy başlıybız,”-dip söyli “Almost” media platformasına nigez saluçı häm baş möxärrire Kassi Ço.
Zararı faydasınnan kübräk bulırğa mömkin.
“Goodable”nıñ idaräçese Möxämmät Lila algoritmnarnıñ keşelekkä salaçaq zıyanınıñ östenleklärennän kübräk bulaçağın uylawın assızıqladı. Ul, media häm jurnalistikağa kilgändä, yasalma aqılnıñ tağın da tiz häm yaxşı öyränü öçen uñay yaqları bulsa da, kiläçäk nisbätennän zur yanaw tudıruın äytte.
“Ägär iğ’tibarlı bulmasaq, yasalma aqıl cämğıyät’ne yuq itäçäk. Min anıñ çınlıqta şulqadär xätär buluın uylıym,”-di Lila. Ul keşelärneñ yaxşı häm naçarnı ayıru sälätlären yasalma aqıl texnologiyäsenä tapşırularınıñ zur problema ikänlegen citkerä.
Lila yasalma aqıl texnoılogiyäläre üskän sayın bik küp keşeneñ êşen yuğaltaçağın assızıqlıy. “Jurnalistlar, yasalma aqılnı qullanmasa häm anıñ yaña kontent tudıru köçen añlamasa, tormıştan artta qalaçaq,”- di ul.
Çığanaq: "Anadolu" agentlığı
