Xalıqara Bodrum balet festivale
Bolarnı beläsezme? 48/2023
Bolarnı beläsezme? - 48/2023
Türkiyäneñ (Төркиянeң) möhim turizm üzäklärennän berse bulğan Bodrumda 20 yıl buyı balet festivaleneñ oyıştırıluın belä idegezme?
Bıyıl 20nçe tapqır oyıştırılğan Xalıqara Bodrum balet festivale Türkiyäneñ berençe häm berdänber balet festivale bulıp tora. Mädäniyät häm turizm ministrlığınıñ Däwlät opera häm baletı ğomum mödirleğe tarafınnan Bodrum Şähär xaqimiyäteneñ yärdäme belän uzdırıluçı festival’ här yıl avgust ayında Bodrumnıñ simvolı häm bügenge köndä Su astı Arxeologiya muzeyı bularaq qullanıluçı Bodrum nığıtmasında “Kuzey Hendeği” isemle säxnädä ütä.
Däwlät opera häm baletı ğomum mödirleğe 2003 yıldan birle här yıl oyıştıra bu çaranı. Sänğat’neñ iñ matur çağılışlarınnan berse bulğan balet bu tarixi binada, Bodrumnıñ tanılğan mandarinnarı ise astında quyıla. Dön’yada bik äz, Türkiyädä isä berdänber bulğan bu festival’ Bodrumnıñ maturlıqlarına öleş kertä. Här yıl balet festivalenä qızıqsınu da arta. Şaqtıy ildän häm törle mädäniyättän biregä sänğat’ söyüçelär kilä.
Däwlät opera häm baletı ğomum mödirleğe Xalıqara Bodrum balet festivalennän tış Türkiyäneñ başqa möhim turizm üzäklärendä dä oyıştırğan festival’lär belän sänğat’ çaraların tarixi urınnarda täqdim itä. Bolar - İstanbulda, Äfäs borınğı şähärendä häm Antaliyadağı Aspendos borınğı teatrında uzdırılğan opera häm balet festival’läre. Bu möhim festival’lär dön’ya ŝivilizaŝiyaseneñ başlanğıç urını bulğan Anadolu cirlärenä yaña qıymmätlär kertä.
