“Pänçä qılıç” hawa xäräkäte

“PKK” terror oyışmasınıñ, Süriyädäge bäyläneşle törkeme “YPG”ne qullanıp, İstanbulda oyıştırğan terror höcümennän soñ Türkiyäneñ kötelgän cäzalaw adımı yasaldı. Milli saqlanu ministrlığı yasağan belderügä kürä, Törek qorallı köçläre, “Pänçä qılıç” hawa xäräkäten başlatıp, Süriyädäge häm Ğıyraqtağı “PKK/YPG” tämeklären bombaladı. Xäzergä qadär biş yözgä yaqın tämekkä ut açılğan bulsa, terror oyışmasınıñ 250 tiräsendä äğ’zaseneñ täêsirsez xälgä kiterelüe dä belderelde. Xäräkät 1 meñ 200 çaqrım çik buyı sızığında çikneñ 150 çaqrım ar’yağında bik kiñ mäydannı üz êçenä alğan bulsa, “PKK/YPG”neñ panika êçendä buluı kürenä.

““PKK” terror oyışması törek ğaskäreneñ Ğıyraqta häm Süriyädä başqarğan xäräkätläre häm MİT Milli küzläw oyışmasınıñ turıdan-turı güya citäkçelärne (atamannarnı) nişan itep alğan tigezlämädä poçmaqqa qısıla bara, bigräk tä Ğıyraqnıñ tön’yağında Zap töbägendä bik awır yuğaltular birep, üze öçen strategik töbäkne yuğalttı. Bu wazğıyätne qabul itä almağan terror oyışması üç alu omtılışı belän bigräk tä Türkiyäneñ metropolislärendä terror ğamällären başqaru yulın êzli ide. Şaqtıy terror höcüme omtılışı totqarlanğan bulsa da axır çiktä İstanbulda Taksimdä bombalı terror höcümen oyıştırıp, tınıç xalıqtan küp sanda keşeneñ ülemenä säbäp buldı.

Türkiyä, bu höcümgä bik kisken reakśiya kürsätep, “Pänçä qılıç” hawa xäräkäte dip isem quşqan cäzalaw xäräkäten başlattı. Ğıyraqnı häm Süriyäne ber’yulı üz êçenä alğan şuşı xäräkät qısalarında 1 meñ 200 çaqrım çik buyı sızığında çikneñ 150 çaqrım ar’yağına qadär cäyılgän kiñ mäydan hawadan ut astına alındı. Milli saqlanu minstrlığı belderüenä kürä, berençe 3 köndä tuplam biş yöz tämek bombalandı, yaqınça 250 “PKK” terrorçısı täêsirsez xälgä kiterelde.

Süriyädä Täl Rıfat, Mänbic, Ayn äl Arap, Ayn İsa, Qamışlı häm Malikiyä kebek töbäklärdän Ğıyraqta Hakurk, Kandil häm Asosqa qadär cäyılgän urınnar tämek itep alındı.

“PKK/YPG”neñ dä bu qadär kiñ qolaçlı cäzalaw xäräkäten kötmäwe häm awır yuğaltular cähätennän panika atmosferasına kerüe añlaşıla.

Distälärçä oçqıç häm keşesez qorallı hawa apparatları belän boyırıq häm kontrol’ üzäkläre, xärbi nığıtmalar, künegülär häm öyränü lagerları, xärbi kiräk-yaraq saqlağıçları häm tunnellär nişan itep alınğan bulsa, Törek qorallı köçläre berençe tapqır “PKK/YPG”neñ Süriyädäge ênergiya asqormasın häm bäyläneşle qorılmaların da ut astına ala başladı. Bigräk tä Malikiyä-Qamışlı sızığında neft’ qoyıları (skvajinaları), neft’ êşkärtü qorılmaları häm gaz mäydannarı yuq itelde. Şulay uq çik buyınıñ 75 çaqrım ar’yağındağı Däyr äz Zor töbäge bombalanıp, ber ük waqıtta “PKK/YPG”neñ “YAT” isemle, AQŞ xärbiläre tarafınnan öyrätelgän êlementlarnıñ ğomum üzäge dä keşesez qorallı hawa apparatları belän nişan itep alındı.

Türkiyä hawadan häm cir östennän “PKK/YPG”gä qarşı kiñ qırlı cäzalaw xäräkäten däwam itterä, läkin terror oyışmaları da tınıç xalıqnı nişan itep alıp cawap birergä tırışa. Ayn äl Arap töbägennän Karkamıştağı tınıç xalıqqa höcümnärne oyıştırdılar, şulay uq Azäz şähäreneñ nişan itep alınuın kürdek. Törek qorallı köçlärenä xärbi yaqtan qarşılıq kürsätä almağan terror oyışması, tınıç xalıqnı nişan itep alıp, üzen kürsätergä tırışa. Fäqät tınıç xalıqqa qarşı bu höcümnär Türkiyäneñ terrorçılıq belän köräştäge qatğıylığın tağın da arttıra.

İlbaşı Ärdoğan soñğı belderüe belän ciröste xäräkäteneñ işaräten dä yañadan citkerde. Ärdoğan monnan alda da ciröste xäräkätenä qağılışlı açıqlawlar yasağan, läkin Putinnıñ Äsäd rejimı belän söyläşü täq’dimen qabul itep xäräkätne tuñdırğan ide. Ütkän şuşı waqıt êçendä rejim belän nindi dä bulsa ber alğarış bulmadı. Şulay uq soñğı hawa xäräkätlärendä “PKK” belän yänäşä torğan küp sanda rejim ğaskäriyı dä üterelde. Axır çiktä Türkiyä milli iminlegen täêmin itä alu häm höcümnärne tulısınça tuqtata alu öçen kiñ qolaçlı ciröste xäräkäte belän “PKK”nı çik buyı sızıqlarınnan tulısınça çistartırğa mäcbür.

Xalıqara kon’yunkturanıñ Türkiyä belän bergä, Türkiyäneñ yağında bulğan şuşı çorda Törek qorallı köçläreneñ ciröste xäräkätlären başlatuı zur ixtimal kebek kürenä. Berençe nişanda bulğan töbäklär isä Täl Rıfar, Mänbic häm Ayn äl Arap.

Can ACUN

SETA säyäsät, iq’tisad häm cämğiyät tikşerenüläre waqıfınıň tışqı säyäsät tikşerenüçese