Azärbaycan İlbaşı Äliyıvneñ Üzbäkstan säfäre

2022nçe yılnıñ 21nçe-22nçe iyün’ könnärendä Azärbaycan İlbaşı İlham Äliyıv Üzbäkstanğa ike könlek räsmi säfär yasadı. Xalıqara İslam Kärimov hawa mäydanında Azärbaycan Däwlät başlığın Üzbäkstan Baş ministrı Abdulla Aripov qarşı aldı. Bu vizit - pandemiyadan soñ İlbaşı İlham Äliyıvneñ berençe räsmi çit il säfäre.

Azärbaycan İlbaşı İlham Äliyıvneñ Üzbäkstan säfäre Taşkenttağı Xäydar Äliyıv mäydanın açıp cibärü belän başlandı. Xäydar Äliyıv mäydanınıñ açılışın ike il Däwlät başlıqları bergä yasadı. Şunı da iskä töşerep uzıyq: 2010nçı yıldan birle Taşkentta Xäydar Äliyıv isemendäge Azärbaycan mädäniyät üzäge êşçänlegen alıp bara häm şuşı uq şähärdä Xäydar Äliyıv isemen yörtüçe uram bar.

Şul uq könne Üzbäkstan İlbaşı Şäwkät Mirziyayıv Azärbaycan wazıyfadaşın Kuksarayda tantanalı räweştä qarşı aldı. Qara-qarşı häm wäkilleklärara söyläşülär ütkärelde. İlbaşları urtaq kapital salu fondınıñ buldırıluı mäs’äläsendä kileşte. Söyläşülär axırında ike il arasında 18 dokumentqa imza salındı. İke il däwlät başlıqları strategik xezmättäşlekne arttıru häm här ölkädä xezmättäşlekne üsterü beldergesenä qul quydı.

Matbuğat wäkilläre öçen oyıştırılğan cıyılışta Üzbäkstan İlbaşı Şäwkät Mirziyayıv ike yaqlı mönäsäbätlärneñ yaña däräcägä kütärelüe, qabul itelgän qararlarnıñ tormışqa aşırıluı öçen ike ilneñ urtaq komissiya räistäşläreneñ här ay oçraşaçağın, yasalğan häm başqarılaçaq êşlär belän bäyle söyläşülärneñ uzdırılaçağın belderde.

İlbaşı Mirziyayıv ayıruça noyabr’ ayında İlbaşı İlham Äliyıvneñ Sämärqandqa kiläçägen häm şuşı waqıt aralığında ike yaqlı mönäsäbätlärneñ üsterelüe öçen ni çaqlı yul uzuların qarap çığaçaqların iskärtep uzdı. Säfärne tarixi bularaq bäyäläwçe İlbaşları ike yaqlı mönäsäbätlärneñ arttırıluı öçen säyäsi ixtıyarnıñ buluına basım yasadı.

2022nçe yılnıñ 22nçe iyün’ könne Üzbäkstan häm Azärbaycan Däwlät başlıqları Xivä häm Ürgäneç şähärlären bergä gizde. İlham Äliyıv xörmätenä xalıq sänğätçeläre konśert quydı. İlbaşları sänğätçelär belän oçraşuı waqıtında ike xalıqnıñ urtaq qıymmätlärenä basım yasadı häm qardäşlek yullamasın citkerde.

2021nçe yılda Üzbäkstan-Azärbaycan urtaq säwdä küläme 118 million 900 meñ dollar bularaq tormışqa aştı. İlbaşı İlham Äliyıvneñ Üzbäkstan säfäre aldınnan uzdırılğan Üzbäkstan-Azärbaycan êş forumında 500 million dollar külämendä kileşülärgä qul quyıldı. İq’tisad häm säwdä ölkäsendä ike ilneñ xäzerge potenśialınıñ tulısınça qullanılmawın äytergä bula. Urtaq investiśiya fondınıñ buldırıluı, transport ölkäsendä xezmättäşlekneñ arttırıluı häm byurokratik kirtälärneñ beterelüe Üzbäkstan-Azärbaycan iq’tisadi êlemtälären yaña däräcägä kütäräçäk. Üzbäkstanda 243 Azärbaycan särmayäle şirkät êşçänlek alıp bara.

Azärbaycan - Üzbäkstan öçen Könbatışqa açılğan qapqa wazğıyätendä bulsa, Üzbäkstan - Azärbaycan öçen Kön’yaq Aziyağa qısqa yuldan ireşü mömkinlegen birä. İke ilneñ ciröste, avtoyul, diñgez, hawa häm timer yul transportında zur xezmättäşlek potenśialı bar.

Täräqqıyätlärdän kürengänçä, Azärbaycan İlbaşı İlham Äliyıvneñ Üzbäkstan säfäre ike yaqlı mönäsäbätlär, törki dönyanıñ häm xalıqara törki oyışmalarnıñ köçäyüe cähätennän bik näticäle uzdı.

Abdrasul İsakov